Dawa ka JSU, JYF & HNPF u weng noh ia ki bru wa ksoh contractual post

Jowai: Ki le tylli ki seiñ wa kynthup ia ka Hynniewtrep National People’s Federation (HNPF), ka Jaintia Student Union wa ka Jaintia Youth Federation (JYF) ynne ka sngi da lai iachem ki ia u CEM ka JHADC u ma Thombor Shiwat hapoh ka ophis iong Oo, heiwa da emlang leh u Chairman ka JHADC u Laitsing Shylla.

Kini ki le tylli ki seiñ da li ujor ki ia u CEM  yow pyndooh noh u ia ki contractual post iong u Principal Secretary, u Officer on Special Duty, Planning Board Secretary wa u Finance Secretary,  ha ka nongrim wa kini ki post man kiwa pyllut phut ka council wei heijooh i por da pynthut ko ia ki promotion iong ki officer hapoh iong kini ki soo tylli ki post.

U CEM ong u wa ka Council da thung ko ia kini ki soo ngut yow iarap ia ka council neibhah man kiwa biang bha i sniawthuh ki ia i rukom kreh ka council kamjooh leh man ki kam ki nongsikai ia ki nongkreh ka council ha kiwa boonjait ki kaam. Ong chooh chooh u leh wa ha ka JHADC ka kyrdan waheh dooh kiwa kreh toh kut ko kat ha i kyrdan Secretary don hi. Na itea i daw kini ki soo ngut ym ye ki u khang ia ka promotion ki wa hapoh iong ki. Ong chooh chooh u kini contractual post ymtoh ki official post. Ia ki da su da ka honorarium wa 40,000 tyngka chibnai ka wa mih naka Extra Expenditure Contingency fund.

Na ka liang ki nongmihkhmat ki sein ong ki, em jingtip ki wa em na kini ki contractual post kiwa da neh da ki phaw snem ha u wi don hi u bru katæ da pynman ko kawa sniawphylla kamjooh leh pyndooh lad ko ia kiwi kiwa toh u ioh ia ini i kreh.

Related posts

Da khut Tender wow chna noh ya ka Iawmusiang Market Complex

November 21, 2024

Pyntikna u Wailad wa da phah yei tyrwa cha ka sorkar pyrdi wow chna thaw puræ Nurse ha Mukhla

November 21, 2024

Da mih leh ka jingkylli wa hadooh katwon tlot i kreh kam ki officer ka council wa hap emkaam sikia wei u chaniah beit ki ha kini ki soo tylli ki post da ki  phaw phaw snem.

U ma Laitsing Shylla da e nuksa u wa dei wa em kini ki contractual post da chem ki chiteiñ ka poisa wa 4 klur 70 lak wa wiar napoh ka council.

Hei wa kut ini i iachem ha kani ka sngi u ma Thombor Chiwat da ong u, wa dang dep pynthymme wot ia ka kontract kini ki soo ngut hadooh wa kut uni u snem wei daw pyrkhat noh ka council deiwi nadooh wa poi u snem thymme.

Na ka laing kini ki le tylli ki seiñ da e por ki 30 sngi ia ka JHADC u pyndooh noh ia kini ki soo tylli ki contractual post.