Jowai : Kam wow pynkynmoo heini ki stat sayan (Scientist) ka Meghalaya State Pollution Control Board ha kani ka tayaw wa da dep da hiar ki cha Khaddum, Star Cement, Sunapur wa ha Myndihati wow li sylli (test) ya ka um ka wah Lukha hadien wa da kylla rong bneiñ næ rong blue ko.
Ynne ka sngi katkam ka khubor wa da pyllait da u Cultural & Environmental Secretary ka Jaintia Students’ Union (JSU) u Chebha Passah ynne ka sngi da pynsniaw u yei sñiawkhia yong ka seiñ hajrong i kylla rong Blue biang ka wah Lukha, kawa man kawi naki wah wa em naam hapoh ka Ri-Loom Jaintia.
Neiliang ka seiñ JSU da ong kynnoh ko wa i kylla rong kani ka wah toh neidaw ki bih wa mih na ki karkhana khyndaw bilat weiwa lada toh nei tih mooyong, kammon ye u ngait neibhah wa i tih mooyong da khang ka NGT la aw jan ar snem kattu.
“Kamtæ hajrong ini i nongrim ka JSU dawa ko na ka MSPCB wa toh u pynche ko yeini waroh khamtam wa lai li takit li sylli ki ka ha ka 24 tarik uni u bnai khnang wa ki paidbah u tip ki yei sakhiat waroh” da ong ka khubor na u ma Passah.
Ha i jooh i por ka JSU da pynrem joor ko leh ya ka JHADC hajrong wym chimkhia ko ya kani ka wah. Da kynnoh leh wa ka JHADC tip ko du u dai lilam ya kani ka wah man u snem katwa yow thooh lad u yada ya ka won ka JHADC ym bna ko.
Neiliang ki khubor wa tikna ka MSPCB da ong wa ym pu dep leh ya ki test waroh weiwa mar ya dep yoh ya ki report daw phah ya ka cha u DC ka East Jaintia Hills District.
Discussion about this post