Ka seiñ JSU-Khliehriat ha i yahkhmat u General Secretary u Emmanuel Bhoi wa u Vice President u Laskiborn Siangshai da lai yachem ki ya u DMHO ka East Jaiñtia Hills hajrong i pynslem ka sorkar wow pynku kyrdan ya ka Khliehriat CHC cha ka Civil Hospital hapoh ka District.
Ka seiñ ha kani ka sngi da chem ko chiboon ki duna hapoh kani ka thaw sumaar wei ym pu biang pura ko kam ka CHC nadooh i em ki tiar sumaar ya kiwa kjut wa i emkaam wow pynbha chooh chooh ya kani ka thaw sumaar deiwa wanrah leh ki Senior Doctor, u pynku kyrdan leh yaki Doctor kiwa da em slem ha kani ka thaw sumaar khnang wow ye ki u chakri rap bha ya ki paidbah ka District waroh kawi.
Neiliang u General Secretary ka seiñ da ong u wa ka chnat i chait i khiah hapoh i pait u montri ka chnat i chait i khiah da ye ki wow pynsmat yei pynku kyrdan chwa ya kani ka thaw sumaar cha ka Civil Hospital neibhah wa ha East Jaiñtia Hills District ym em da kiwi won ki Hospital wa rap biang katni wei kiwa boon kiwa kjut ka District da hap ki wow lai chadooh cha Jowai Civil Hospital, Ialong yow yoh yei sumaar wa rap biang. Kamtæ neiliang ka seiñ da dawa ko na ka sorkar wow pynchah chkoor ya i eh ki paidbah kani ka thaaiñ.
Ka seiñ daw lai booh kyrpang ko da i thoh cha ka sorkar lyngba u montri ka chnat i chait i khiah ha ki tayaw wow wan yow pynsñiaw cha ka sorkar ya i dawa Civil Hospital hapoh East Jaiñtia Hills District.
