Ynne ka sngi u Thombor Shiwat uwa man kam u CEM ka JHADC da pyntip u wa em hadooh 37 tylli ki Coke Factory kiwa da e NOC ka JHADC wei ki kot ki sla wa emkaam wow pynbiang kini ki karkhana toh ka NOC na u Waheh Chnong, Dolloi, Land Holding, i yoh bor naka Single Window Agency, Registration wa kiwi kiwi.
Yeini da jubab u Thombor ha ka Yung Dorbar Mang Tangka ka Council hajrong i kylli u MDC ka BJP u Lakhon Biam heiyatoh wa kini ki karkhana.
U Lakhon da ong u wa ha kini ki sngi wa dadep da yoo wa mih joor i pyrchah na ki paidbah wa ki seiñbhalang hajrong i thmu wow chna ya kawi ka karkhana pynmih Coke ha chnong Mynkrem Shangpung wei da kylli u wa lada kani ka karkhana da wan paan bor ko na ka Council.
Hajrong ini, u Thombor da kubur u wa da em ki paidbah wa ki seiñbhalang kiwa da wan pynsñiaw yei pyrchah yong ki wei oo leh da yoo u ha ki khubor wa em i pyrchah, kamtæ neiliang ka EC ka Council leh da rai ko wa ym e ko ya ka NOC wow chna ya kani ka karkhana ha Mynkrem Shangpung.
Hajrong ini i jubab neiliang u Lakhon da ban joor u wa oo samen u kyrchaan u ya ka Council ha ini i pyndooh NOC ya kani ka karkhana.
