Ka JSU-War Jaiñtia Circle hapoh i yahkhmat u President yong ka, u Eddy Kery Pohtam wa u Dewan Bareh da lai ujor ki cha ka yung krehkaam Territorial Office ka Bharat Petroleum Corporation Limited ha ka 7 tarik uni u bnai wow pyrchah yei sangeh krehkaam syndet ka Petrol Pump ha Tamabil, Dawki.
Ka seiñ da sñiawkhia ko chiboon hajrong ini neibhah wa nadooh wa sdang ka Lockdown wei da khang yei khayi khappood lyngba ka Land Custom Dawki, kani ka Petrol Pump ym em de pynkhreh phñiang ko wow dai ya ki kari iwa da booh ya kiwa boon hapyrdi i eh i khoo khamtam ya ki paidbah ka thaaiñ khappood khamtam neidaw wa hapoh ka Amlarem Sub-Division em du ar tylli donhi ki Petrol Pump hajrong kani kawa em sa kawi ha Shkentalang.
Ka seiñ da ong ko wa hadien wa da sangeh kani ka Petrol Pump u dai phñiang, ki bru ym yohsa de ki haap thied ki dei phñiang wa da dai tooh namo dai Black hei dor wa syad iwa da ktah ya ki paidbah ha iwa boon i liang.
Ka seiñ da pynrap ko leh deiwa ong wa i dai syad dor yei phñiang da pynchitom i ya kiwa kreh sorkar khamtam kiwa yatoh wa i kaam i chait i khiah kam ha ki CHC wa ki PHC kiwa haap pynlut rap boon hawa lai wa wan luti ki hapyrdi i yakhun ya ka khlam COVID-19.
Kamtæ ka seiñ da dawa ko wa kani ka Petrol Pump (ha Tamabil, Dawki) u sdang krehkaam noh ko khnang wow myntoi ki paidbah liang wanang.