Hadien wa joor i pyrchah kat dang mih ki sngi yei thmu wow chna ya kawi ka karkhana Coke yong ka M/S Unique Industry ha Wah Deiñling, da mih leh i chah maham hapyrdi ki arliang wa kynthup ya kiwa kyrchaan wa kiwa pyrchah ya ini i thmu (wow chna ya ka).
Kam wow pynkynmoo heini hadien wa mih ini i thmu wow chna ya kani ka karkhana, da sdang ya kawi ka satri ki seiñbhalang heiyatoh wow pyrchah yeini i thmu (wow chna ya kani ka karkhana) wa tip leh kam ka Joint Action Forum (JAF) wa kynthup ya ka SBYWA, JYF-EJH, JSM-ER, ka NEIPF-SEBR wa kiwi kiwi. Katkam i kam ka JAF, i thmu wow chna ya kani ka karkhana toh hapyrdi ki soo chnong wa kynthup ya ka Umsatai, Ladwahwapung, Deinsatlang wa Pynurkba wa haap hapoh ka Elaka Rymbai ka East Jaiñtia Hills.
Neiliang ka JAF da pynbaad ko wa yaka NOC wa da e wow chna ya kani ka karkhana da e du da ki kattu katni ngut donhi na ki bor chnong khlem tip ki paidbah wei kat dang mih ki sngi neiliang ki Dorbar Chnong leh da rai pyndam noh ki yaka NOC wa da e neibynta wow chna ya kani ka karkhana.
Neiliang u CEM ka JHADC, u Thombor Shiwat hawa yaklam hajrong kani ka kaam wa dawa ki seiñ wow pyndam ya ka NOC wa da e ka Council neibynta wow chna ya kani ka karkhana, neiliang u Thombor da ong u wa ya kani ka kaam daw yaklam ha ka yalang ka Executive Committee ka Council kawa daw man ha kani ka 14 tarik uni u bnai.
Da pynrap u leh deiwa ong wa ya i rai wow pyndam namo wow pynsangeh ya kani ka NOC ym chong i du ha oo samen donhi tangwa chong i ha i rai ki dkhot ka EC waroh neibhah ini man i kaam neibynta i bha i miat yong ka Ri-loom Jaiñtia hi waroh kawi khlem pait chiliang.
Hajrong i pyndam ki dorbar chnong ya ka NOC wa da e neibynta u chna ya kani ka karkhana, neiliang u Thombor da ong u wa ka EC wa ka Council hi leh emkaam u burom ko ya i rai ki Dorbar Chnong wei katwa kamtæ da rai wow chong pyrkhat yillu yeini i kaam ha ka yalang ka EC ka Council wei du hadien itæ daw ye u chim ya i rai wa pura.