Ka KSU da ujor ko cha u Director ka North East Indira Gandhi Regional Institute of Health & Medical Sciences (NEIGRIHMS), Shillong heiyatoh i khut yaleh kreh neibynta ki Group B wa Group C Post kani ka thaw sumaar.
Ka seiñ da kdaw ko wa i pynman yei yaleh ya kini ki kreh da e kti ha ka HLL wei da jied ko soo tylli ki thaw wow pynman kam ki Examination Centre, kitæ ha Shillong, Guwahati, Jorhat wa Delhi. Wei ya kani ka HLL Agency da jied neibhah da man ko kawa biang wow pynman ya kani ka Exam yaleh kreh.
Tangwa hadien ini kiwa yaleh kreh da tip ki wa da em sa kawi ka Examination Centre ha Dibrugarh wei kiwa boon kiwa napoh ka jylla da booh ya ki wow lai yaleh Exam ha kani ka chnong kiwa daw pynman ha ka 17 wa 18 tarik uni u bnai.
Iwa phylla toh wa nadooh wa sdang da em ka Shillong, Guwahati wa New Delhi yow man kam ki Exam Centre wei kiwa boon napoh ka jylla da jied ki ya ka Shillong kam ka thong chong yaleh Exam ki wei lada ym yoh ha Shillong u jied ki da ka Guwahati, tangwa kiwa boon napoh ka jylla da phah yaleh Exam ki cha Jorhat wa cha Dibrugarh. Kamtæ ka seiñ da ong ko wa kani ka HLL Agency kawa pynman ya ka Exam ymtoh kawa da biang wow pynman ya kam kini ki jait Exam.
Ini i leh bakla ka HLL Agency da pyndooh mynsien ko ya kiwa napoh ka jylla neibhah kiwa boon toh kiwa dooh wa duk wei da man iwa lut phut wow pynkhreh u lai cha ki thaw wa jngai neibhah ka bai lai wa ki thaw sah leh man ki kiwa sa’at, da ong ka seiñ.
Kamtæ ka seiñ da phah ko wow pynbait yeini waroh khnang wa kitu kiwa na Meghalaya u yoh ki wow chong yaleh Exam hapoh ka jylla yong ki hi.
Chooh chooh ka seiñ da pynkynmoo ko yei kular u Director wow thooh ya ki Computer Centre wa em ha Shillong kiwa ye wow pynman ya kini ki CBT Exam.
Ya kani ka ujor da phah leh cha ka Montri ka chnat i chait i khiah, ka Dr. M. Ampareen Lyngdoh.
Discussion about this post