Hadien wa da yoh ujor na ki paidbah waboon walang kiwa lai phah sumaar ha Khliehriat Civil Hospital wa duna ki dawai ha ka Pharmacy sorkar wa em ha kani ka thaw sumaar hadooh wa hap wow lai thied na ki Pharmacy wa syad dor wei ini da ktah i ya kiwa dooh wa duk kiwa wan phah sumaar deiwa yooluti leh wow yoh dawai na ka Pharmacy sorkar.
Kamtæ ka KSU East Jaiñtia Hills District Unit hei yahkhmat u President, u Streamly S Suchen ha ka 3 tarik uni u bnai da lai ko wow yachem wa u District Medical and Health Officer DMHO ka East Jaiñtia Hills wa ya u Medical Superintendent (MS) yow sñiawthooh wei wow pyntikna yeini wa ujor ki paidbah.
Neiliang u DMHO wa u Medical Superintendent da ong ki wym tip tikna hajrong i em ki dawai ha Hospital neibhah wa yeini i kaam da e kti ha u Drug Inspector (DI) uwa pait ya ar tylli ki District kitæ ka West wa East Jaiñtia Hills wei ym em ya u Drug Inspector wa pura hapoh ka District.
U DMHO wa u MS da kular ki wow chimkhia wei wow pyntip cha kiwa haneiñ wow leh wei wow pait yeini wa ujor ki paidbah.
Kamtæ ka seiñ da dawa ko wow thung noh da u Drug Inspector wa pura hapoh ka District wei daw lai yachem leh wa u Montri ka chnat hajrong ini i kaam.
Discussion about this post