September 22, 2020

Dawa ka KSU wow takit ka sorkar yei piah ki thaw booh jhep Uranium ha South West Khasi Hills

Advertisement ad1

Hadien wa mih khubor wa pdung ki top booh jhep Uranium ha Nongbah Jynrin, ynne ka sngi ka KSU South West Khasi Hills District hapoh i yahkhmat u Jiedskhem Nongsiej, General Secretary ka KSU South West Khasi Hills District da lai pait ko ya ini i thaw.

Ha ini i lai pait hapyrdi u slap wa joor da chem ka seiñ yei piah ki thaw wa booh jhep Uranium ha ki 4 tylli ki top wa da rap joor ki katni bar yei por wa nachwa neibhah kam ka seiñ jooh poi ko cha kani ka thaw neipor cheipor wei da yoo ko yei yaphær katni lada wyrchaw yei por wa nachwa.

Neiliang ki dkhot ka seiñ da poi ki du ha ki 4 tylli ki thaw wa booh jhep Uranium (ha ki thlu) wei da em ki thaw kiwa ymye ki wow poi cha ki thaw wa boon neidaw wa kmai ka um wa i joor u slap, deiwa pynrap leh wa daw booddien ko yeini hadooh wa chemtre ko yeiwa sakhiat.

Heiyatoh wa i heh i piah kini ki thaw wa booh jhep Uranium, neiliang ka seiñ da ong ko wa da man i iwa rap heh wei ymye u pynsakhiat neiyi i daw wa pdung ki.

Neiliang ka seiñ da ong ko leh wa neipor cheipor da jooh yaklam ko wa ka sorkar hajrong i pai thlu wei kaad i piah ki top wa booh yei jhep Uranium tangwa sñiawsih won ko wa neiliang ka sorkar ym em u chimkhia ko wow leh hajrong ini waroh.

Da dawa ko leh wa emkaam wow takit hajrong ini wa neiyi i daw wa piah wei pai kini ki thaw booh jhep Uranium khnang wow chem yeiwa sakhiat deiwa pynrap leh wa ki bor sorkar u chimkhia ki yeini khnang wow yada wei wow myntoi ki paidbah.