Ka 4-Mowkaiaw Block Congress Committee (MBCC) da dap ko dei sñiawkhia hajrong i thmu ka Assam wow booh Police Outpost hapoh u pood ka chnong Saba neibhah wa kani ka chnong haap ko pura hapoh u pood u ang ka jylla wei ymtoh ka thaw khappood wa yakajia namo ka Disputed Area wei ym haap hi ko leh hapoh ka Block-1 Area.
“Ka MBCC da dap ko dei sñiawsih wow yoo wa ka sorkar MDA hapoh i yahkhmat u Conrad Sangma kam u montri rangbah wa u Lahkmen Rymbui kam u montri ki kaam pohyung ym chimkhia ki yeini wot hadien ki dkhot ki seiñbhalang da chah jrongkti ki wei chah pynmynsoo ki ha ki paidbah Karbi, wei yeini da sakhi yei pteiñ ki pulit ka Assam wow kreh ya i yung Outrpost yong ka,” da ong u Nehimaya Tyngkan uaw man uwa ebuit ya ka Committee.
Neiliang MBCC da dawa joor ko na ka sorkar Meghalaya wow khang wei wow pynsangeh ya i kreh ha ini i yung neibhah deiwa em kani ka Outpost ka Assam daw booh ko hei eh wa khroo ya ka pateiñ kawa daw wan.
U Tyngkan da ong u wa ka NPP neipor cheipor khamtam ha ki Election ong ko wa u pood u ang toh ka mat kawa haphrang dooh kamtæ emkaam wow chimkhia ko yeini i kaam deiwa beiñ ya kiwa emkti wow pynmynsoo ya ki dkhot ki seiñbhalang.
