Ka Southern Border Youth Welfare Association (SBYWA), Elaka Rymbai & Lakadong, East Jaiñtia Hills District hapoh i yahkhmat u Namphrangmi L Talang General Secretary ka seiñ deilang wa ki dkhot kam u S. Biam wa u W. Syrti da lai yachem ki ya u Executive Engineer, Meghalaya Power Distribution Corporation Limited, Khliehriat Distribution Divison hajrong ka yurim wow dawa kylliang noh yaki chrot bordiñ yaki chrot bordiñ kiwa em ha chnong Natbor kiwa da baam sarang kiwa da booh hei maa ya kiwa chong chnong ha kiwon kiwon ki por khamtam ha ini i por lyiur wa joor u slap waka laær.
Nalor ini, ka seiñ da dawa ko leh wow kylliang ya uwi u chrot bordiñ ha ka chnong Umlyngsha uwa da jan kheiñ heiwa kiwa chong chnong da em ki ha i syier mynsien khamtam kitu ki manyung kiwa em hajan utai u chrot.
Kamtæ ka Association hadien wa yoh ujor ko na kiwa pynlai chnong da lai yachem ki markhmat wa u EE, MePDCL deiwa e leh dei thoh ha ka 4 tarik uni u bnai yow dawa kylliang syndon ya kitai ki chrot bordiñ khnang yow lait na i jia wa sñiawsih hapoh ka chnong ka thaw waka thaaiñ hi.
Neitæ ha i yaklam wa u EE, MePDCL da kular u ha khmat ka Association wow yaklam wa ki bor wa haneiñ khnang wow yoh kylliang rap smat ya kitai ki chrot bordiñ ha kitai ki chnong wei ha i jooh i por ka Association da pynsñiaw ko leh yei sñiawdiaw hajrong i kheiñstiñ yong ka chnat bordiñ wow kylliang yaki chrot bordiñ khamtam hadien wa ka chnong Natbor da dep ko wow e dei thoh nadooh ka 04-06-18 wei hadooh katni ym pu em kylliang ya kitai ki chrot bordiñ da pyntip u Talang.