Ka Synjuk Waheh Chnong Ri Jaiñtia (SWCRJ) da dawa ko na ka sorkar jylla wow pynbait thymme yei rwai Meghalaya Anthem deiwa thap lang ya ka ktien na Jaiñtia kamwa da pynpsiah ya ka ktien Khasi wa Garo.
Ya ini i dawa da pynsñiaw da u President ka synjuk, u Army Lipon deiwa emlang wa ki dkhot wa kiwa yahkhmat ka Synjuk Waheh Chnong Ri Jaintia hawa yaklam wa kiwa thoh khubor ynnin ka sngi.
Neiliang u President da ong u wa da sñiaw diaw u yeini i leh ka sorkar wow mylliñ ya waroh kiwa na Ri-loom Jaiñtia iwa da ktah bha yei sñiaw yong ki waroh.
Da pynkynmoo u wa yaka Meghalaya da yoh kam ka jylla ha u snem 1972 deiwa thoh leh wa ha Meghalaya em le jaitbru ri-loom kitæ ki Khasi, Garo wa Jaiñtia.
Kamtæ da ong u wa lada yaka ktien Khasi wa Garo da kynthup lang haka Meghalaya Anthem, ka sorkar leh toh u kynthup lang ko yaka ktien ki nong Jaiñtia khnang wow im ka jaitbru.
Da kdaw u leh wa ha i Video da pynmih du yeiwa hiar Aitnar i lehniam Behdieñkhlam da ka Raij Jowai wei da yooluti leh wa i ktien na Jaiñtia leh toh u mih tangwa kat u yoo da mih dei ktien English.
Khang wow man salonsar toh u emlang leh i ktien ki bru kiwa na Jaiñtia yow yoh bynta lang hapoh ka imlang sahlang, wei da kyntu u leh ya ki 7 ngut ki MLA ka Ri-loom Jaiñtia wei kamjooh leh u Montri ka chnat Arts & Culture ka sorkar jylla wow pait ki yow pynthymme yow e bhah lang ya ki nong Jaiñtia neibhah lada man kamni daw tynyap syndon ya ka ktien Jaiñtia.
Da ong u leh wa pdiang ya kawon kawon ka ktien tangwa ya ka ktien na Jaiñtia toh u tip pyrthai neibhah wa man ko kyrpang la ha ka niam ka rukom waka dustur riti. Hajrong ini, ka sorkar toh u pyrkhat bha ko wow e bhah kyrpang lym kamtæ ka synjuk daw pyrkhat ko da kawi ka luti wei khnang wow lait na kiwon kiwon ki kaam wa man pyrchah yaka sorkar wa kiwon kiwon ki jia wa sñiawsih kiwa ktah yaka ri waka jaitbru.
Discussion about this post