Jowai: Katkam ka aiñ næ ki kyndon yong ka JHADC No: JHADC/Leg/7/2015/15, wa ka Council toh ka kawa jied yaki waheh chnong hadien wa da dep pynbait da u Dolloi wei yaka sanat won toh u e daka District Council, hei yong sakhiat i tipmit næ wow e yaki Identity Card leh toh i kamram yong ka District Council wow e cha ki waheh chnong ym da kiwi won ki bor.
Tangwa ha i klam ki MDC BJP wa ki kattu kani ngut ki waheh chnong warim da jooh pynsñiaw ki cha u CEM yong ka JHADC tangwa ym em e ya ini i paan yong ki, kiwa da pynsñiaw ya iwa emkaam yaki Identity Card wow pynsakhiat ya i kaam wa ksoh ki, kamwa man kattæ ym pu em ki waheh chnong kiwa yoh yaka Identity Card (ID) na ka yung krehkaam yong ka JHADC.
Iwa jia kattæ won, ki Synjuk Waheh Shnong Ri Lum Jaintia da hap ki wow chna hi yaka ID kawa toh u yoh naka JHADC wei da phah soi næ hap tyrwa da u Deputy Commissioner kamwa man kattæ.
Heiyatoh wa ini, neiliang ki MDC ka BJP hapoh ka JHADC, kiwa kynthup ya u Lakhon Biam, u Dawan Lyngdoh wa kiwi da dawa ki wa toh u pyndooh noh ya ki ID wa da chna hi da ka Synjuk Waheh Shnong Ri Lum Jaintia wa da soi lang da u Deputy Commissioner wei da dawa wa ka EC wa katni ka JHADC u chim ko ya kani ka kamram wow pynyoh ID ya ki waheh chnong lyngba ka yung krehkaam yong ka JHADC.
Chooh chooh ki MDC ka Party BJP da dawa ki naka EC ka JHADC wa katni kawa yahkhmat da u Thombor Shiwat wow leh smat ko ya kani ka kaam neibynta wow im ki kyndon waki riti krehkaam yong ka Council.
