Ynne ka sngi da pynman ya ka yalang hapyrdi ki Rangbah Shnong ka Mawlai chirup ki seiñbhalang wa u Montri Rangbah ka jylla, u Conrad Sangma ha Shillong hajrong i chah siat yap u Cherishsterfield Thangkhiew uwa man u General Secretary warim ka HNLC ha i step ka 13 tarik uni u bnai iwa da wanrah ya i awri awra wa joor bha.
Ha kani ka yalang da emlang leh ki khlieh ka Peace Committee wa sdang da ka sorkar jylla wa kynthup ya u Symbood Montri Rangbah, u Prestone Tynsong wa ki ar ngut ki montri ka sorkar jylla, u Renikton L Tongkhar wa u Hamletson Dohling.
Ha kani ka sngi neiliang ki Rangbah Shnong da ekti ki ya ka dorkhat wa em ki soo tylli ki mat dawa na ka sorkar wa kynthup wow beh kreh chipor ya kiwa emkti wow siat yap ya u Thangkhiew katwa dang takit Judicial Inquiry hajrong ini i jia.
Da thoh ki leh hajrong i uiñ sonteri ki pulit chipai (Central Paramilitary Force) ha Mawlai, i khang ya ka Internet wa ka Curfew.
Chooh chooh da wanrah ki leh ya ka phang hajrong i kyrriah ya ka CRPF Camp kawa em ha Mawlai Nongkwar.
Hadien ka yalang neiliang u Conrad Sangma da ong u wa ka sorkar da chimkhia ko ya kani ka phang wei heiyatoh wa i beh kreh chipor ya kiwa emkti, ka sorkar dang yang ko ya ka bui na ka Judicial Inquiry ya kawa da khlieh da u Chairman ka MPHRC, u Justice T. Vaiphei wei hadien itæ daw ye u leh yeiwa emkaam.
Heijooh i por ki Rangbah Shnong da dawa ki wa neini chaphrang lada em iwon iwon i takit næ i lai kynreh ki pulit emkaam wow pyntip ya ki bor chnong yeiwa ka sorkar leh da pdiang ko yeini wa daw pyntip chwa neini chakhmat.
U Conrad da ong u wa ka sorkar da kyrpaad ko ya i yakrehlang wa ka sorkar neibynta u ye u wanrah biang ya i chongsuk ha Shillong wa ka jylla hi waroh kawi.
Heiyatoh wa ka Peace Committee neiliang ka Mawlai da kyntait ko wow embynta ha kani ka Committee kat hadooh wa da ye ka sorkar wow beh kreh chipor ya ki pulit wa emkti ha i jia ha ka step 13 tarik.
