Shillong: U montri rangbah ka jylla u Conrad K Sangma da ong u wa ka sorkar daw bichaar bniah ko ya i dawa wow phah takit ha ka Central Bureau of Investigation (CBI) ya iwa jia ya ka Amita Sangma wa ka Agnes Kharshiing heiwa da chah pynmynsoo ki ha ka 8 tarik u bnai wa da dep ha chnong Shohshrieh, East Jaiñtia Hills.
Ynne ka sngi kiwa ha yung yong kini ki ar ngut ki manbei da yachem ki wa u montri rangbah wow dawa e kti ya ka takit cha ka CBI tangwa neiliang u Conrad da ong u wa ka sorkar daw rai ko ya ini ha ka yalang ki montri sorkar wei kamjooh wa ka chnat kaam poh yung. Da ong u wa ka sorkar ka kwah ko wa ka takit u man kawa laitlooid kawa ym em bynta ki bru sorkar wei katni dang yoo biang wow leh ya ini.
Da ong u leh wa ka takit da lai smat ko hanlada ym pu em yoh u kem ya waroh kiwa emkti neidaw wa ym ye wow pyndik ya ki bru du wow kem ya ki 30 ngut kiwa chah pynbaad.
Heiyatoh won wa u dkhot ka NPP na Jaiñtia Hills, u Nidamon Chullet uwa chah pynbaad wa em ha khmat wow pynmynsoo ya ka Agnes waka lok ko, u Conrad da ong u wa ka sorkar ym maap ko ya ki bru wa emkti wei ka aiñ u leh ko ya ki kaamram lada man uwon uwon u bru lada man ki leh ki dkhot ki seiñ saiñ pyrthai.
Neiliang u John F Kharshiing da pyntip u wa i yachem ya u montri rangbah toh neibynta wow dawa na ka sorkar wow e kti noh ya ka takit cha ka CBI yow lait u sahkut ka takit.
Neiliang ka Amita Sangma da ong ko wa ka sorkar toh u e kti bait ko ya ka takit cha ka CBI neidaw wa ym chaniah ko yei takit ki pulit.
Ha i jooh i por da pyntip ko wa i lai cha ka Lad Rymbai Police Outpost ha ka 8 tarik u bnai wa da dep toh wow paan pulit wow yada ya ki hawa lai chondur ki ya ki thaw wa booh mooyong tangwa neiliang ki pulit ym em ye ki u leh ya ini neidaw wa ong ki wa duna pulit ha katai i por.
Discussion about this post