Kiwa rep wa ki tre thaw ka chnong Shnongrim, Elaka Nongkhlieh, East Jaiñtia Hills, da pynsñiaw ki yei sñiawkhia wa joor yei chah khanglaad ki wow lai chimbynta ha ka Public Hearing ka M/s Shree Cement Ltd kawa da pynman ha Lum Syrman ha ka 31-07-26.
Katkam ka chiti wa da booh ha ki bor sorkar, kiwa rep da ong ki wa nadooh i por 7:00 waje i step hawa dang lai ki cha ka Public Hearing, da chah khanglaad ki ha Lad Shnongrim NEC Main Road da ki pulit kiwa em kamwa 35–40 ngut. Wei kini ki puli katkam i ong yong ki, da pyntip wa da em ka hukum wym chah ya kiwon kiwon kiwa pyrchah wow lai ki cha ka Public Hearing.
Kiwa rep da ong ki leh wa wot hadien wa ki dadep phah chithi ki cha u Deputy Commissioner ha ka 29-07-26 yow kyrpaad heiwa da chah u ya ki tre thaw wow chimbynta ha ka Public Hearing, tangwa ini i kyrpaad yong ki ym em mankaam i.
Na ini i daw, ha ka 3 tarik uni u bnai, neiliang ki tre thaw wa kiwa rep da lai booh dorkhat ki ha ka Meghalaya State Pollution Control Board wei ynne ka sngi won ha u Deputy Commissioner ka East Jaiñtia Hills District wei da phah leh cha ka State Environment Impact Assessment Authority (SEIAA) wa cha ka State Expert Appraisal Committee (SEAC), Meghalaya.
Ha ka dorkhat, kiwa rep da kyrpaad joor ki wow pynman ya ka takit kawa laitlooid hajrong i chah khanglaad ki paidbah wow chimbynta ha ka Public Hearing. Wei da kyrpaad leh wym toh u e kiwon kiwon ki NOC næ i e bor cha ka M/s Shree Cement Ltd ha ka thaw rep ha Lum Syrman kat wym pu ye u pynbait yeini i eh wei wow bichaar hok yei ood ki paidbah.
Kiwa rep wa ki tre thaw da ong ki wa ha ka luti i synchaar paidbah kawa katkam ka aiñ da kyrmen wa ki bor wa toh u pait wow chimkhia ki yeini i eh yong ki wei wow leh yeiwa toh katkam i hok wa ka aiñ.
Discussion about this post