U waheh chnong ka Narwan u Lamsuk Langstang, u waheh chnong ka Tympiahkasu u Shibor Langstang wa u waheh chnong Sahkai u Lim Shadap da thoh ki cha u Additional Deputy Commissioner ka East Jaiñtia Hills wow kyrpaad yow pynsangeh noh yaka No Objection Certificate ka Coke Factory wa e da u Dolloi ka Elaka Sutnga.
Haka chithi da ong wa kani ka NOC wa da e u Dolloi toh yaka Coke Oven Plant ka wow booh ha chnong Sookilo, East Jaiñtia Hills wei da leh ya ini khlem da pynsñiaw ya u paidbah wei neitæ i daw da dawa wow pynsangeh chwa ya kani ka NOC.
Da ong leh wa ka chnong Sookilo em ko hapyrdi wei da kær soo dong yaka da ka chnong Moopala, Narwan, Tympyiahkasu, Sakhai, Umlawang kiwa boonbru kamwa 1000 tam deiwa kheiñlang wa ki khynnah.
Da ong leh wa ka chnong Narwan, Tympiahkasu wa Sahkai da jooh maad ki yaka la-ær wa wan na Sookilo kawa pynngad hadooh ka æryong tangwa lada booh ya ka Coke Plant ha Sookilo daw ktah joor ko ya kiwa chong chnong Sookilo wa ki chnong wa marjan.
Da kdaw leh yei chah ktah ki bru wa chong wa sah hajan ka Coke Factory wa em ha Mookhep na i tdem wa i smatung yong ka la-ær wa mih na kani ka karkhana wei na kini ki daw ym sñiaw yahap ya kam kini ki Coke Factory wow em chajan ka chnong yong ki bru.
Ki le waheh chnong da thoh ki leh cha u Dolloi ka Elaka Sutnga yow dawa pynsangeh yei e bor wow booh ya kani ka karkhana kawa daw ktah yaka rymaw wei khlem da ya phyllu yumut wa kiwa chong chnong wa cha jan.
Ya ini i jooh da pyntip cha ki MLA, u Member Secy. ka MSPCB, ki pulit wa cha kiwi ki chnat sorkar.
Discussion about this post