U MLA ka North Shillong, u Adelbert Nongrum ynne ka sngi hapoh ka yung dorbar da wanrah u yaka phang yaklam hajrong i chim bai skur wei pynku bai skur katwa ngait da ki skur yong ki bru samen kamjooh ki skur wa yoh kyrchaan na ka sorkar namo ki Government Aided School.
Da ong wa ini i rukom pynku bai skur toh khlem da yaklam wa ki bei ki pa ki khynnah wei da leh katwa ngait wa kynthup nadooh ka bai skur wa man-u-bnai kamjooh ka bai skur hawa sdang u snem kawa ynru chah yaka bai skur wa man-u-bnai.
Chooh chooh da ong u wa kini ki skur ym e daw ki leh wa pynku bai skur ki, wei kammon ka chnat puræ puthi ym em pait ko yeini wei ym ye ko leh wow booh kyndon khamtam kitu ki skur wa yoh poisa naka sorkar.
Da ong u leh ha kiwi ki jylla da booh kyndon ki hadooh katwon u chim bai skur wei ileh ha Meghalaya ym leh yeini.
Ha iwi i liang da ong u wa ki bei ki pa toh u em hok ki wow ong lada syad ware, wei lada kini ki skur samen da leh ki yeini du wow chna poisa da man ko pyrchah yaka aiñ.
U Montri ka chnat puræ puthi, u Rakkam A Sangma da jubab u deiwa ong wa da em boon ki khynnah kamjooh ki bei ki pa kiwa da wan yaklam wa oo heiyatoh wa ini wei ka sorkar daw puræ bniah ko ya ini waroh wei da dep leh wow thung da ka Meghalaya State Education Commisison.
Da ong u leh wa ini ymtoh du kat ha ki skur tangwa wot ha ki College wa ki University leh kamjooh wei daw yang kammon tyrwa kani ka Commission.
Heiyatoh won wa i pynbna ka sorkar da ka School Calendar, da ong u wa da leh yeini yow pyntikna wa ki khynnah lai skur ki katkam ki sngi wa i por wa da booh da ka aiñ Right To Education.
Discussion about this post