Ka VPP lyngba u President yong ka uwa man leh kam u MLA ka Nongkrem, u Ardent M Basaiawmoit ynne da wanrah u ya ka mat yaklam deiwa booh 10 tylli ki mat dawa ka VPP na ka sorkar hapoh ka yung dorbar chna aiñ ka jylla heiwa iwi toh yow sangeh yei dai yei thaw ka jylla cha ki Company.
Hawa e yei jubab heiyatoh wa ini, u Montri Rangbah ka jylla, u Conrad K Sangma da ong u wa ka sorkar toh kawa chimkhia wow yada yei thaw wei ki thaw wa dai toh katkam ka aiñ Meghalaya Land Transfer Act.
U Montri Rangbah da pyntip u wa hawa kwah wow dai yei thaw, da pynmih yei pynbna lyngba ki Expression of Interest (EOI) wei ki tre thaw da wan ki chakhmat yow tyrwa katkam i dor wa kwah ki.
Chwa wow dai leh da pynman ya ki Public Hearing da u DC wei deiwa pyntikna leh wa da biang ki NOC.
Chwa wow thied yei thaw da pyntikna wa biang i dor wei u ye u leh yeini toh du hadien wa mynjur ka Cabinet ka sorkar yei dor ymtoh iwa rai da ki chnat sorkar.
Wei yeini da leh hawa e kti yei thaw yow chna pynheh ya ka Shillong Airport kamjooh hawa thied thaw neibynta ka New Shillong Township.
Kamtæ u Conrad da ong u wa manda leh yeini waroh ym jooh dam u khut u yaklam wei deiwa yoh yei mynjur kiwa chong chnong yow leh yeini waroh.
Hajrong ini da ong u ya ka VPP wow leh yei kaam katkam wa yalap phi neibhah hapoh ka KHADC da em i pynkylla ya ka aiñ deiwa wanrah ya ka KHADC Regulation of Land Amendment Bill 2026 heiwa da pyndooh pyndam ya ki kyntien Dorbar Shnong, Dorbar Hima, Dorbar Raid hapoh kani ka aiñ iwa pynyoo wa man mar dei khangtleiñ ya iwa dawa, kamtæ u Conrad da booh u dei dawa kylla ya ka VPP wow leh ko yei kaam kamwa da yalap ko.
Discussion about this post