Jowai : Ki Dorbar Chnong wa ki Dong wa boon wa em hopoh Jowai ynne da pdiang burom ki ya u snem thymme da i baamdoh yonglang ha jar jiar ki kyntoit yong ki. Da leh ya ha ka 2 tarik neidaw wa ka 1 tarik toh ka sngi Bibar.
Da yoh u sakhi yeini ha kiwa boon ki Dorbar Chnong wa ki Dong heiwa da wan khynnah wa kiwa heh wei da embynta ki ha i bamdoh khlem ñiaw chilliangkhmat lada kiwa yoh næ dooh.
Hadien wa da dep baamdoh da pynkhreh won sa ya i chaad paidbah khynnah wa kiwa heh hei kieh i ood ki sur wa chongchit kiwa mih na ki tanghæng wa da pyndait ha ki kari wa da pynriam ha ki rong wa phooh wa phieñ.
Ha ini i chaad paidbah da lai tymbud ka Jowai wei da yachemlang ki ha Iawmusiang ha i thaw wa da pynkhreh ka Jaiñtia Tourism & Environment Society (JTES).
Ha kani ka janmiet da em leh i jied ya ki chnong wa ki dong kiwa wan 16 tylli hajrong i miat i pdiang snem thymme dei klah nasib ya kiwa da wan chaad ynne ka janmiet.
Ha uni u snem da klah nasib heiwa da eh ka bok yong ka Moosalyngkat, Tpep Pale Dorbar Chnong wa ka Dongmihsngi wei da yoh ki leh mar T. 5000 kawi na ka JTES.
Ya kani ka janmiet da pynkut won da i ah ya u cake wada pynkhreh da ka JTES.
Discussion about this post