Ka seiñ EJNC waka seiñ HYC kiwa man leh kam kiwi na ki seiñ wa em hapoh ka Save Hynñiewtrep Movement (SHM) heiwa kawi na ki phang wa pynman ya kani ka yakhih toh yow pyrchah ya ki kyndon heiyatoh wa i khih mooyong wa da em katkam ka aiñ ka sorkar pyrdi wa emkaam yei thaw wa heh ym duna 100 Hectare yow ye u yoh ya ka Prospecting License kamjooh yow tih mooyong.
Neiliang u President ka seiñ EJNC, u Sambormi Lyngdoh da ong u wa ini da booh ko hei eh ya ki paidbah kiwa kwah u khih mooyong neibhah wa duna ware ki bru wa em yei thaw wa heh hadooh 100 Hectare wei da pyrchah leh ya ka kyndon wa ong wa kiwon kiwon ki Company wa na baar ye ki wow ya soi soskular wa ki jaitbru ri-loom ka jylla yow ye ki leh wow yaleh ya ka Prospecting License wei kani ka kyndon daw ktah ko ya ka riti-dustur ka yong i neibhah hadooh katni hapoh ka jylla dang pyrchah ya kiwon kiwon ki kaam wa man Benami.
Da ong u leh wa kani ka kyndon da tikna wa daw em bait ka Benami ha ka khayi mooyong wei kini ki kyndon toh kiwa da chna ka sorkar du neibynta kitæ ki High Level neibhah u Montri Rangbah ka jylla, u Conrad Sangma heipor wa wan u ha Jowai da ong u wa ym pu em pynkhreh kyndon wow pynkhian yei heh i thaw wa emkaam yow tih mooyong wei yeini daw leh won hadien manda yoh chwa u tih mooyong.
Hajrong ini da pyntip wa hapoh ka SHM da pynkhreh ki ya ki kot lakdop wow saam cha ki paidbah ka East Jaiñtia Hills yow pynche paidbah kammon u chah ktah lada pdiang ya kini ki kyndon ka sorkar.
Ha iwi won i liang, da pyntip wa ka SHM ha ka 30 tarik uni u bnai kawa man leh kam ka lyngkhooh sngi yap u Kiang Nangbah daw pynman ya ka Rally namo ka lai paidbah kawa heh bha ha Khliehriat kawa daw sdang nadooh na Teilang Playground kawa em ha Dkhiah East deiwa lai kjat hadooh wa poi u mot u Kiang Nangbah wa em ha pchem ka yung krehkaam u DC ha Khliehriat.
Daw pynman leh yei booh syntu ha uni u mot u Kiang Nangbah, kamtæ da khut ya kiwa chong chnong ka East Jaiñtia wow ya mih ryntih ha katai ka sngi yow pynkynmoo leh cha ka sorkar ya ki 9 tylli ki phang dawa kiwa ka SHM da booh ko hakhmat ka sorkar wei kani ka Rally u man ko leh kam i sdang i pyrchah ya ki kyndon sorkar heiyatoh wa i tih mooyong hajrong ki ar tylli ki kyndon wa da dep kdaw haneiñ neibhah kini ki kyndon u pynmyntoi ko du ya ki Company wa ki heh spah wei daw man ko kam i tim ya kiwa khian wa nai.
Puræ leh: Daw yaklam wow pynkhian yei thaw wow tih mooyong na ka 100 Hectare: Conrad
