Ka BJP ynnin ka sngi da pynlait ko yaka Election Manifesto yong ka kawa da e pyrtuid kam ka “Sankalp Patra” kam chibynta ka thong wow wan biang hei bor ha ka sien wa le heiwa da pynlait ya kini ki yurim wa yieñ yaleh Election da u PM ka ri, u Narendra Modi deilang wa u Defense Minister, u Rajnath Singh, u Home Minister, u Amit Shah, ka Finance Minister, ka Nirmala Sitharama wa u National President ka BJP, u JP Nadda.
Ki kular wa rap kongsan toh wow wanrah yaka One Nation , One Election heiwa daw pynman yaka Election heijooh i por ha waroh kawi ka ri.
U pynyoh bordiñ deiwa mynkna cha waroh ki manyung wa dooh hapoh ka PM Surya Muft Bijli Yojana.
U pynsmat yei kær ya u pood ka ri waka China, Myanmar wa Pakistan.
U pynman yaka India kam ka ri wa le hapoh ka pyrthai kawa khlanbor dooh hei khayi pateiñ.
U pynkrehkaam ya ka aiñ Citizenship Amendment Act kamjooh leh yaka Uniform Civil Code.
U e khoo rachon dei mynkna cha ki 80 klur ngut kiwa chong chnong ha kini ki san snem wow wan hapoh ka PM Garib Kalyan Anna Yojana.
U kynthup lang ya kiwa yah kari kamai nadooh ki Taxi, ki Auto wa ki Truck hapoh ki Scheme e yarap ka sorkar.
Da kular leh wow pynku yei dor Minimum Selling Price namo i dor wym toh de u hiar ki mar rep wei yeini u leh neipor cheipor wei daw e yarap leh Rs. 6,000 hapoh ka PM Kisan Samman Nidhi Yojana.
U e leh yei sumaar sukhær wa mynkna hadooh Rs. 5 lak cha ki manyung wa dooh hapoh ka Ayushman Bharat Yojana.
Heiyatoh wa i thung kreh da kular wow pynman ka kawa khooid deiwa pyntikna wym lait tooh ki thup yukylli (Question Papers) wei wow pynchitom da iwa joor deiwa wanrah da ka aiñ wow pait pyrchah ya kini.
Discussion about this post