Ka Dorbar Chnong Chutwakhu, Jowai ynne ka sngi da pynkut noh ko yei lehkmen dap 100 snem ka chnong namo ka Centenary Jubilee Celebration ha madan Jrisaleiñ hapyrdi i phooh i phieñ.
Ha kani ka sngi pynkut lehkmen, u Montri ka sorkar jylla uwa man leh u MLA ka thaaiñ, u Wailadmiki Shylla da wan sakhi u kam u kongsan, chirup i emlang ki ar ngut ki MP kiwa man kam ki symbood kongsan wa kynthup ya u Dr. W.R Kharlukhi, MP Rajya Sabha wa u Dr. Ricky A.J.Syngkon, MP Lok Sabha.
Da emlang leh u Awhai Andrew Shullai, MDC ka JHADC, u Dolloi ka Elaka Jowai, u Puramon Kynjing, ki waheh chnong wa ki bru wa bna naam ki chnong waphær waphær ka Jowai, najrong kiwa chah khut sñiawbha.
U Dr. W.R. Kharlukhi hawa klam da pynkynmooo u yei por khynnah por khynroo u ha Jowai kam uwa da kha wei heh san ha chnong Jowai, hadooh wow yoh u ya kani ka kyrdan.
Hawa yaroh wei pyn-eh-daw pyn-eh-nasib yei lai luti ka chnong Chutwakhu kamjooh leh yow nang ku ko na ki snem cha ki snem, ong u kam kiwa mihkhmat wa da yoh yei kyrdan dei kyrchaan ki paidbah, i kaamram yong ki won toh u lehbha kylliang ya ki paidbah.
U Dr. Ricky A.J. Syngkon hawa klam ong u, i bha næ i sih, i hiar næ i ku, i dooh næ mahajon, i khooid næ tngit lada toh ha samen, ha ka yung ka sem, ha ka chnong ka thaw, ka imlang sahlang wa ka ri ka jaitbru chong ko hei thij pyrkhat.
Wei hanla maad chiboon i eh haka imlang sahlang wa ka jylla ha kiwa boon rukom, yooluti u wow jop deiwa em i kitkhlieh u leh iyi ræ iyi ym du ya idæ, najrong wow pynbait thymme yei thij i pyrkhat khlem da mylliñ leh ya u Blai uwa ye u leh ya kiyi kiyi waroh.
Hawa kyruiñ u cha ka Moto ka Chutwakhu kawa ong “Ieibha Ionglang” ong u kani toh kawa em i yumut wa yillu kawa khut i yakrehlang hapoh ka chnong ka thaw wa ka imlang sahlang neibhah du samen ym ye u chna pyrthai.
U Wailadmiki Shylla hawa klam kam u kongsan ong u nadooh wa chah jied u kam uwa mihkhmat em u ka thong u kreh chitom neibynta u pynku ya ka roi ka paar, ka imlang sahlang ka Constituency ym wow nangpynhiar ya ka.
Wei yeini yooluti u wa ha man uwi pa kawi na kiwa chong chnong ka pateiñ katni ha ka chnong Chutwakhu leh em ki i jooh i pyrkhat wow nangpynku chooh chooh ya ka chong ka thaw.
Chooh chooh ong u, haka juk katni lada yaklam yei roi i paar ym em de u mang du yei roi ha ki jait wa tei wa chna, tangwa em chiboon ki bynta wa hap u booh thong yei ku ka chnong ka thaw ka jylla wa ka ri.
Tangwa boon won kiwa mang i da ku i stat i tip, da i hiar i dooh ya ki mynsien ha i chait i khiah, em won kiwa yatoh heiyatoh wa i kmen ki paidbah wa chong chnong.
Neiliang yong oo won kwah u wow yoo wa i ku toh u man ha waroh ki liang wei hajrong kani ka thong yooluti u wow man ka jooh hi ka thong ha ki paidbah wa chong chnong.
Kam u Montri ka chnat Sports & Youth Affairs kamjooh u MLA ka Jowai, sñiawkmen haroh u wow pyntip wa heiyatoh wa ka National Games ka wow man ha jylla Meghalaya, da jied leh wow pynman kamwa le soo tylli ki jait yalehke ha ri-loom Jaiñtia.
Heiwa nyngkong ong u da rai wow pynman du ha Garo Hills wa Khasi Hills, tangwa deiwa jop ka Meghalaya Games kawa da pynman ha uni u snem ha Jowai, ka ri-loom Jaiñtia leh da yoh bynta ko.
Yooluti u wa deiwa wan ka National Games daw man biang i kyrkhu khamtam ya ka chnong Jowai wow yoh ko ya i tei i chna wa rap bha chooh chooh, wei dang thooh laad kattæ wa ha Chutwakhu u man kam kawi ka thaw wa pdiang ya kiwa wan yalehke.
Heijooh i por ong u em chiboon i dawa hapoh ka chnong Jowai wei emkaam u yakrehlang khang yow jop yei eh wa boon khamtam ka thaw noh jhep wa dang sahteiñ hadooh katni.
Ha kani ka sngi da wai leh ya ki mooyurim ka Scheme yarap na u Dr. W.R. Kharlukhi, MP Rajya Sabha yow chna pynheh ya ka yung krehkaam ka chnong, ka Scheme chna Public Toilet wa da yoh ka chnong na ka chnat Urban Affairs wa u moo sahnaam hajrong i lehkmen dap 100 snem ka chnong Chutwakhu.
Da pynlait paidbah leh ya ka Souvenir ka chnong Chutwakhu wei da pynkup burom leh ya kiwa ksoh kaam warim wa kiwa katni ka chnong.
Chwa ini da yoh i klam na u waheh chnong ka Chutwakhu, u P.W. Lyngdoh uwa da khana yei lai luti ka chnong, wei da pynchongchit ya kani ka sngi da i rwai i chaad na ki khon ka chnong.
Discussion about this post