Shillong: U montri khynnah ka tnat External Affairs ka Sorkar India, u Mobashar Jawed Akbar ynne ka sngi da wan poi u cha ka jylla wow yalap yei lehkhooid, tangwa ha kani ka sngi i klam u Akbar da kylla ko chei sdang yong ka BJP wow yalap neibynta ka Election MP ka wow man ha u snem 2019, neibhah ha i klam da yaroh bait u ya waroh ki kaam yong u montri rangbahdooh ka ri, u Narendra Modi khamtam ki Scheme sorkar India hapoh i yahkhmat u Modi.
Hawa klam ha ka yalang kawa man ha John Robert Theological Seminary ha Mawklot u montri da ong u wa ka sorkar wa yahkhmat da ka BJP na Delhi da pyllait ko ya ki manbei ka ri na i chah kdoh bor ha i diñ wa ki chet ki da ki dieñ, heiwa 8 klur ngut ki manbei da yoh ki ya ka subsidy kum LPG na ka Scheme yong ka sorkar kiwa wan na ki manyung wa dooh wa duk.
U Akbar da pynroh u leh ya ka luti wa da lai ka sorkar pyrdi wa da pynbna ha kini ki sngi ya ka National Health Insurance Scheme (NHIM) wa da mang hadooh T.5 lak neibynta kawi ka manyung ha waroh kawi ka ri India.
“Ka thong yong u Modi toh wow pynbha pynbiang wei ym em yaklam ya kiwa mahajon tangwa neibynta kiwa dooh ha ka ri,” da ong u.
Hawa kyruiñ won cha ka yalap lehkhooid, kam chi bynta wa i thmu u Modi ya waroh kawi ka ri, ka Swachhata Hi Sewa næ ka Cleanliness is Service kawa da sdang nadooh kani ka 15 tarik uni u bnai ha waroh kawi ka ri wei daw kut ko ha kani ka 2 tarik u bnai wow wan kawa man leh ka sngi kha u Mahatma Gandhi, neiliang u montri ka sorkar pyrdi ha kani ka sngi da lum u leh ya u sarok wa em ha ka chnong Mawklot, East Khasi Hills.
U Akbar da yaroh u leh yei khooid wa i miat kani ka thaaiñ deiwa ong wa rap ñiaar wow chem ya kam kini ki thaw kiwa em hapoh ka jylla Meghalaya cha kiwi ki jylla.
“Ym du u Blai uwa da chna miat ya ka rymaw ha kani ka thaaiñ tangwa kiwa chong chnong leh pynneh ki ya i khooid wa i miat,” ong u Akbar.
Da ong u leh wa kawon kawon kawa da sdang toh wow poi cha ka thong wei ymtoh u sdang donhi tangwa ym poi de ki cha wa kut.
Discussion about this post