Ka Jingiaseng Samla Jowai Presbytery Socio & Economic Life Development chirup i yakrehlang wa ka Jowai Municipal Board, ynnin ka sngi da pynman ki i pynsñawthooh paidbah hajrong i khooid i jngiar wa emkaam nadooh na yung hadooh ha lait wa tip kam ka Civic Cleanliness (Waste Management) ha Chutwakhu Indoor Sports Hall, Jowai.
Da wan wow chimbynta ha kani ka yalang pynsñiawthooh paidbah da ki khon ka Jowai Presbytery na ki Balang chnong waphær waphær.
Chwa ini da yoh i klam na u Chairman ka Jowai Municipal Board, u Philander Lyngdoh, uwa da yaroh ya ka Jingiaseng Samla Jowai Presbytery wa chim ko ya kani ka luti wow pynsñiawthooh hajrong i khooid i jngiar, deiwa ong leh hawa lehkhooid emkaam leh u tip kammon u pynyakhlaad yei jhep wa mih na ki yung ki sem, ki dukan dukdoh wa kiwi.
Da ong u leh wa boon ki chnong wa marjan ka Jowai ym slem de hap ki u em ya ki Civic Bodies neidaw wa da nangboon nangroi kiwa chong chnong, kamjooh leh wa da chynna yei sdang mih kiwa boon ki jait dukan dukdoh.
Kam ki bru wa chong wa sah ha sla pyrthai toh u man kiwa tip u sumaar syndong ya ka ramaw wa da e kyrpang u Blai, wei lada noh taroi yei jhep kat chawa yoh da man kam kiwi na kitæ ki bru wa embynta hei pynsih pynjæd pynpra ya ka rymaw ka soodong sookun.
Yei klam batai bniah hajrong ka mat yong kani ka yalang pynsñiawthooh da yoh na ki arngut ki bru chemphang wa kynthup ka Palvy Dora Kharkongor wa ka Larisa Lakadong kiwa man ki IEC Specialist SBM, Urban Meghalaya.
Kini ki bru chemphang da batai ki yei emkaam wow lehkhooid nadooh na yung wow pynkhlaad yei jhep wa pyut wa ki wym pyut, kamjooh leh ya ki jait jhep wa em i maa yei chait i khiah, da pynyoo nongmuna haroh ki yeiwa jia sakhiat ha kini ki sngi wa katni la ha sor næ palatsor.
Heijooh i por da batai pynche haroh ki hajrong ki kyndon ki aiñ ka Solid Waste Management Rules 2016, ka sorkar India, kawa da khang pyrchah wym hoi u noh taroi yei jhep kat chawa yoh næ la ha ki luti syngkeiñ, ki um ki wah wa kiwi.
Discussion about this post