Ka KSU East Jaiñtia Hills District Unit hadien ka yalang wa da pynman ha ka 14 tarik da chim yei rai wow pynman da ka yakhih paidbah deiwa thiah hapyrdi u sarokbah NH-6 ha Khliehriat kawa man ka Head Quarter ka East Jaiñtia Hills District.
Ya kani ka yakhih u pynman ha ka 25 tarik uni u bnai nadooh 10:00 waje i step hadooh 4:00 waje i janmiet wei yeini da chim rai hadien wa ka NHAI ym ap ko yei dawa ka seiñ wot hadien wa da dep wow pynman yei yakhih ha Toll Gate wa em ha Lumshnong ha ka 8 tarik u Naisaphra heiwa u Manager Technical yong ka NHAI, u Biswa Jyoti Lahkar da kular u wow pyndep yei pynchna ya u sarok hapoh 6 tayaaw tangwa hadooh katni ym em dak iyi iyi leh wa da sdang yei kreh heiwa ka seiñ da dep lai ko chadooh Ratacherra yow pynsakhiat wei wow pyntikna yeini.
Ka seiñ da ong ko leh wa da phylla wa ileh wym em de pynchna ya u sarok u wym hoi de tang u lai kari iwa da yoo wyrai u pait yei chitom ki paidbah kamjooh ki kari kiwa da sih wei ya tyrrah du neidaw wa sih uni u sarok cha palatpood.
Kamtæ ka seiñ da khut ko yei ya krehlang yong phi ki paidbah kamjooh ki seiñbhalang wow chimbynta ha kani ka yakhih wa jai-jai deiwa thiah hapyrdi sarok wei hadien ini ka seiñ da kyntu ko wow sangeh yei lai i wan, i kamai kajih ki kari khian wa ki kari heh nadooh 07:00 waje i miet katai ka sngi hadooh 5:00 waje i step wei ini daw bood chi tayaaw du heipor janmiet.
Ki Ambulance wa kiwi kiwi ki kari wa kam kini ki wa lai ya ki kaam wym hoi u dam ym khang ya ki wei da kyntu leh ya ki paidbah wym toh u pynmih kiwon kiwon ki klumar ha ki kynta wa thiah sarok næ ha ki kynta yong ka sangeh lai kari heipor miet. Kiwa leh tam daw chim hi ki yei kitkhlieh wei ki bor yong ka aiñ daw pynchitom ki.
Discussion about this post