Na ka chnong wa da lut ki dieñ, wa duna um cha ka thaw uiñke suwari kylla dur ka Mawrah

U Chief Minister ka jylla, u Conrad K. Sangma, ynne da lai u wow chimbynta ha ka lehkmen World Environment Day ha Mawrah, EKH heiwa da wai u ya kiwa da chna neibynta kiwa uiñke suwari, da saam u ya ki Green Meghalaya Cheque hapoh ka PES wei da yahkhmat u leh hei thung dieñ.

Hawa wai paidbah ya ki Eco-Cottage wa ka Glass House Restaurant wa em ha nan Mawrah, da ong u wa ini toh yow pynkhlan ya ka Eco-Tourism ha kani ka thaaiñ wei daw yarap ko u pynyoh kreh ya kiwa chong chnong.

U Conrad da e yaroh u ya ka chnong Mawrah deiwa kynmoo wa du ha ki kattu katni snem nachwa kani ka chnong toh kawa duna um kawa stang ki jhoor ki phlang wei ka rymaw leh toh kawa da sih, tangwa kattæ deiwa ya krehlang wa ka chnat Soil Conservation wa kiwi de ki chnat kani ka chnong da man ko kam ka nongmuna ya kiwa heiwa da yoh u yoo yei kylla dei khmat.

Da kdaw u wa kammon da ye wow pynim biang ya ki tyllong um, i chna ya ki thaw pynlang um, i pynyirngam ya ki loom ki wah iwa da pynkylla dur ya kani ka chnong yow man kam ka thaw uiñke suwari wei kawa wai ki laad yoh kreh.

Related posts

Dei yaklam yeiwa chah ktah ka East Jaiñtia nei em ki karkhana ha ka lehkmen World Environment Day

June 5, 2026

Dei pynkhooid yei thaw paidbah wa i ssam tre dieñ 2000 tylli pynman ki chnat krehkaam NPP ha Jowai

June 5, 2026

Hawa wai ya ki Eco-Cottage wa ka Glass House Restaurant, da ong u wa da chna ya ki ha itæ i rukom wa phær bha iwa daw pynman ya kiwa wan maad wow sahkynmoo ki.

Neiliang u Chief Secretary ka jylla, u Shakil P. Ahammed da ong u wa ha ki 10 snem wow wan, ki bru daw wan ki cha Meghalaya ym du wo pait yei mait tangwa yow yoh leh ya ka la’ær wa khooid.

Da khana u wa ha ki 5 snem wa da lai, da ye wow pynman khloo biang ya 25,000 Hectare i thaw deiwa booh thong sa 14,000 Hectare neibynta uni u snem wei yeini da ye wow leh deiwa e yarap ya ki chnong ki thaw yow thung dieñ deiwa yarap poisa lyngba ka Payment for Ecosystem Services (PES).