Ynne ka sngi u MDC ka Mynsngat-Khanduli, u Dawan Lyngdoh chirup wa ki ar ngut ki lok yong oo kiwa kynthup ya ka I. Swer wa u P. Shadap da lai e yarap ki da ki kymmor cha ki 14 ngut ki khynnah kiwa sah ha World Mission Children’s Home (Girls) Moodop, Nartiang, West Jaiñtia Hills District.
Ya kani ka thaw ri khynnah kynthai da sdang ha u 2018 wei ha u 2019 kani ka Children’s Home da tipmit ya ka da ka sorkar.
Ha ka yalang ynne ka sngi chwa wow ekti ya ki kymmor da pyllai da u Rev. H.L Pale, da yoh leh i klam na u Pyndap Shadap wa na u Dawan Lyngdoh kiwa da pynsñiaw wa ini i e yarap toh katkam i bor wa khian yong ki deiwa kyntu ya kini ki khynnah wa ymtoh wow sñiaw chah iehbeiñ ki tangwa wow man kiwa minot khnang wow yoh ki ya ka mynried kawa tyrchaaiñ.
Kam ka dak yong i burom kylliang ya kani ka sngi neiliang ki khynnah da pynyoo ki ya ki sap yong ki da ki chaad.
Ya ka yalang da pynkut da ki kyntien khublei wa da e da ka SP kani ka thaw, ka S Pala.
