Ha i sien wa nyngkong, ar ngut kiwa khayi drugs da chah rai pynrem ki deiwa phah kset phatok hadooh 1 snem khlem da ye wow paan jamin, wei kini ki bru da chah rai pynrem ki katkam ka aiñ Prevention of Illicit Traffic in Narcotic Drugs and Psychotropic Substances Act (PITNDPS).
U Montri wa pait ya ka chnat Social Welfare ka jylla, u Paul Lyngdoh da ong u wa hapoh ka PITNDPS em ka kyndon wow pynchitom deiwa phah kset patok 1 snem næ hadooh 3 snem khlem ka jamin, ya kitu kiwa khayi drugs kiwa da chah kem boonsien neibhah i pteiñ ki wow khayi yei drugs da booh ko hei maa ya ka imlang sahlang.
Da khana u wa napyrdi ki 9 tylli ki Case wa da lai, ar tylli ki Case dadep wow pynmih hukum yow kset ya ki bru kiwa pteiñ wow khayi drugs, wei pyntip u leh wa ki ar ngut toh kiwa tip pyrtuid kam u Hubert Lamphrang Paliar na ka chnong Pyndengrei, Nongstoiñ, West Khasi Hills wei uwi won toh uwa tip pyrtuid kam u Pynhoi Nongtdu na Nartiang, West Jaiñtia Hills.
U Paul da khana u wa hadien wa da chimkti u ya ka chnat Social Welfare ryngkat wa u Symbood Montri Rangbah wa pait ya ki kaam pohyung, da chna ya ka Advisory Board wa da khlieh da u Rtd. Judge yong ka High Court, wei kani ka Advisory Board da bichaar ko wei da pynmih leh yei rai.
U Paul da khana u leh ini toh ka sien wa nyngkong wow pynchitom ya kiwa khayi drugs hapoh kani ka jylla, wei kani ka pynchitom katkam ka kyndon PITNDPS man ko i khyrwait chkoor ya kitu kiwa da myllien ha kam kini ki kaam.
Discussion about this post