Ka Dorbar Chnong Cham Cham deiwa e Award da lehkmen ko ya ka 65th Teachers’ Day 2026 ha ka yalang wa pynman ha yung Club Dong Lelad, Cham Cham hei emlang u Pakalang Phawa kam u kongsan deilang ki khynnah skur, kiwa sikai, ki manbei manpa wa kiwi.
Ya kani ka yalang da pynlai da u Pilin Dkhar wei da yoh yei klam wai phang na u Riyo Phawa uwa man kam u Headmaster ka Sham Sham Secondary, Cham Cham uwa da sneiñ da kyntu ya ki khynnah wow man kiwa minot kiwa kreh chitom, deiwa ong u leh i stat i tip toh iwa kordor bha chisien da yoh i ya ka ym em kiwa ye ka u knieh na i wei ymhoi leh u man i kiwa khapnap wow e lang ya ka cha kiwa emkaam yarap neibhah ymtoh kawa daw lut wei kat dang e dang boon ymtoh kam kiwi ki jait kiwa dang tieñsar i u e ya lut ko.
Da yoh leh yei klam na u Waheh Chnong ka Cham Cham, u Shaiñ Dkhar uwa da sñiawkmen wow yoo ya ki khynnah skur kamjooh ya kiwa sikai ha kani ka sngi lehkmen Teachers’ Day deiwa kyntu ya kiwa sikai wow man kiwa minot wei kreh chitom hawa chakri ya ka imlang sahlang.
Da ong u wa kiwa sikai em ki yei kaamram iwa palat bar ya ka kaamram ki khynnah skur neibhah kiwa ar hadien ka bei wa u pa wow yah sneiñ ya ki khynnah kammon u im ha ka luti wa miat wa bha.
Da yoh leh yei klam na u Pakalang Phawa kam u kongsan ha kani ka sngi uwa da ong wa sñiawsuk bha u wa yoh u ya embyntalang ha kani ka sngi. Da khana u leh yei parom wa tbian wa oo kam u waheh jooh yakit yabah u hapoh kani ka thaaiñ San Chnong heiwa da jooh man u kam u Secretary yong ka Sham Sham Upper Primary School heipor wa dang pait dang pynlai ya kani ka skur da ki 3 tylli ki chnong kitæ ka Cham Cham, Mutong wa Lumshyrmit wei da jooh man u leh kam u Secretary yong ka 5 Shnong Welfare Association Mukhaialong.
Da e u leh chiboon ki kyntien sneiñ kyntu kynrong ya ki khynnah skur, ya kiwa sikai wei kamjooh ya ki manbei manpa u em ki itæ i bahkhlieh ya ki khon ki kti yong ki yoh u man ki khon phi kiwa khreh chitom hei puræ puthi wa kiwa im miat imbha ha i akor i salon.
Da kynmoo u yei chakri u Dr. Sarvapalli Radhakrishnan, President warim ka India, deiwa ban leh yei emkaam u e yei stat katkam wa yah ka juk wa katni wei wow tip lada toh ki kaam wa thok næ sakhiat.
Ha kani ka sngi da pynkup burom ya ki 23 ngut ki khynnah puræ kiwa poi chakhmat ha ki kyrdan puræ waphær waphær kamjooh ya ki khon khynroo yong ka chnong kiwa wanrah naam rah burom ha ki kaam yalehke Sport waphær waphær kiwa yoh Gold Medal ha ka State Level wa ka National Level
Da pynphooh ya kani ka sngi da ki chaad ki rwai wa ki put ki tem na ki khynnah skur kiwa em hapoh ka chnong.
Discussion about this post