Ka Committee yong ka Dorbar Chnong Mooshrot hapoh i yahkhmat u Waheh Chnong, u Janai Suchiang ha ka 27 tarik uni u bnai da pyndep ki wow pynchna dei bor yong ki hadooh ka lut ka sep yei bynta u sarok nadooh laad Sahsniang chadooh Mooshrot deiwa pynemkaam da ka pooh chiloom, ki Truck wa wan pynhaap moo wei khyndaw.
Ini da man ko ka sien wa ar ha uni u bnai wa da leh ki yeini heiwa nyngkong da pynchna ya u sarok na Mooshrot hadooh Myntang heiwa heini leh da pynlut da ka chnong hi heiwa waroh da tam Rs. 1 lak iwa dadep pynlut ka chnong.
U Waheh Chnong ka Mooshort da pyntip u wa da leh ka chnong yeini neidaw wa da joor sih u sarok uwa da dap ktieh wei hadien wa da kular u Executive Engineer ka PWD (Roads) Shangpung Division deilang u SDO wow su yeini wa pynchna deiwa booh hei pyrtuid u Contractor.
Tangwa da chah thok noh ki heiwa neiliang ka PWD (Roads) Shangpung Division won da ong ko wym ye wow su yeini neibhah uni u sarok toh uwa boon bha ki kari wa lai wei daw smat u wow sih.
U Waheh Chnong da pyntip u leh wa da tip ki yeini wym bien ka PWD wow su hadien wa dadep wow thied ya iwa emkaam kamjooh i chim wai ya ki kari kamtæ ha ka 27 tarik da lai ki chakhmat wow pynchna ya u sarok.
Chooh chooh u Waheh Chnong da pyntip u wa u Executive Engineer da ong u wym ye u su ya ki Muster Roll wow wan kreh ki heiwa u Waheh Chnong da pynbaad u wa ki Muster Roll da baam ki ya ka tulop khlem da lai kreh.
U Waheh Chnong da kyrpaad u leh ya kiwi ki chnong kiwa da chah thok ha kani ka PWD Shangpung Division wow wan ki chakhmat.
Discussion about this post