Uwa yahkhmat ka liang pyrchah ha ka jylla, u Dr. Mukul Sangma da khyrwait u deiwa eh ya ka sorkar kawa da pynjynjar ya ki paidbah ka jylla deiwa pynkrehkaam biang yaka Load Shedding, heiwa da ong u wa lada toh iwa ye toh u noh noh ya u Montri Rangbah wa u Montri ka chnat bordiñ kitæ u Conrad K Sangma wa u James PK Sangma na i thaw wa chong ki katni.
Da ong u wa da klam u hawa yatoh wa i kaam bordiñ (Power Sector) ha ka jylla nadooh ki snem 2006-07, deiwa pynrap leh wa ki paidbah toh u sñiawthooh ki yei emkaam yong kani ka kaam bordiñ, neibhah lada iwa em yong ka MeECL chah pynsih ki neidaw wym chimkhia, wei da i khwan myntoi ka jylla, daw yachem yei eh ha ka mynried.
U Dr. Mukul da ong chooh chooh u wa iyi wa emkaam neibynta wow pynbait toh deiwa noh noh ya u Montri Rangbah wa u Montri Bordiñ na i thaw wa chong ki, wei lait na ini, ym em de da kiwi ki laad wow pynlait ya ka jylla na ini i eh, neibhah wa ki em ki da iwi i thmu wa i kwah yong ki toh iwa rap khroo, ym em ki i mon wow pyndam ya ini i eh wei toh ki hi kiwa wanrah yeini i eh wa katni.
Da ong wa khlak khlak da kyrriah kaam ya ki sahep wei da em leh kiwa da hap wow ieh yei kreh deiwa resign noh iwa pynyoo ya i dak yong i leh embor, neibhah kiyi wa embor wow pyndam ya ki sahep na ka Board of Directors lada ym toh u Montri Rangbah.
Da ong u wa ha i por wa rap nachwa da chimkti ya ka chnat bordiñ ha ka jylla, wa lyngba ka Electricity Act 2003, u ye u wanrah ya ki rukom krehkkam yong ka chnat neibhah wa kani ka Act da batai lut ko kammon u pynkhai im wei kyntu biang ya ka kaam bordiñ, heiwa da pyntip u wa oo da wanrah u ya ka Power Policy wa ym toh wow chaniah næ kut du hawa thied na kiwi. Da ong u wa ha ka jylla Meghalaya, ki wah leh em, u mooyong leh em wow pynmih bordiñ da ka MeECL.
