Kiwa kreh ka JHADC hapoh ka lama yong ka Jaiñtia Hills Autonomous District Council Staff Employee Association ynne ka sngi da ya mih lai kreh ki ryntih deiwa sap ya ki riam rong yong kynthai wa chynrang kam ka dak u pynyoo i sñiawsih joor hajrong i wym pu yoh tulop næ yoh kawon kawon ka khubor na ki bor wa hakhlieh wot hadien i yakhih wa dang dep pynman ki haka 04-09-2023.
Kamtæ kam i dak sñiawsih kiwa kreh ka JHADC heipor chiteiñ sngi da ya mih ki naki kamra krehkaam yong ki wei chong biang cha lait ha pchem ka yung krehkaam deilang ki lama rong yong wa da kdoh pynyieñ ha pchem ka JHADC.
U President ka JHADC Staff Employee Association, u Johnson Pohrmen ong u ynne ka sngi pynsñiaw ki yei sñiawwsih khnang wa kiwa mihkhmat u chah chkoor ki yei dawa yong ki, neibhah khlem ka poisa da im ki deiwa lang-a mynsien.
Da ong leh kattu da kut u snem sa du katwon donhi wei ki dawa leh nang joor nadooh wow su bai skur khon, wow pynbiang yei emkaam hei puræ puthi ha u snem wa thymme wa kiwi de.
I sahteiñ i rukom su tulop da pteiñ i aw-jan san snem kattu nadooh u 2019 wei kattæ ka tulop wa dang sah toh kamwa 10 bnai. Kamtæ kyrpad joor u yaka sorkar wow pynlait smat noh yaka tulop khnang wa ki leh u yoh ki wow leh sñiawbha kamwa man kiwi ki para wa kreh sorkar.
Hajrong ini i eh yong ki, kyrpaad joor haroh u ya waroh kiwa mihkhmat nadooh ki MLA, MDC wa MP wow sñiawbha ki u chimkhia yei eh i khoo yong ki.
Hajrong i klam wa sñiaw ki wa em wa ong i yakhih yong ki man iwa bakla, neiliang u Johnson Pohrmen won booh yukylli kylla u deiwa ong, i ksoh bait ya ka tulop yong kiwa kreh JHADC won ymtoh mo iwa bakla? Wei em hi mo kitæ ki kyndon aiñ wa thoh wa toh u ksoh bait ya ka tulop yong ki.
Discussion about this post