Ynne ka sngi ka Mukhla Raij UP School da pynhaap pyrda ko ya i lehkmen dap 50 snem ka skur ha Madan Thad, Mukhla heiwa u Symbood Montri Rangbah ka jylla, u Sñiawbhalang Dhar da man u kam u kongsan hei emlang u CEM ka JHADC, u Thombor Shiwat wa u Montri ka chnat Puræ Puthi, u Rakkam A Sangma kam ki symbood kongsan.
Ya kani ka skur da sdang ha u Naitung 1974 da kiwa chong chnong ki san tylli ki chnong ka Raij Mukhla wow chakri hei stat i tip ya ki khynnah ha kini ki chnong.
Heipor wa sdang ya ka da em du 15 ngut ki khynnah wei katni da em duna 700 ngut.
U MLA ka Jowai uwa man leh u dkhot ka SMC, u Wailadmiki Shylla da ong u wa i daw wa pynphooh ya ini i lehkmen hadooh kat deini toh wow e burom ya kiwa seiñ ya kani ka skur neibhah lym em ki, ka juk kawa katni man ko kawa eh ya ki manbei manpa wow thooh skur cha jngai heiwa daw ktah ya i lai i wan kamjooh i thaw chong thaw sah ki khon.
Da ong u leh wa em chiboon i yaphær nadooh ka niam ka rukom, u pood u ang ki san tylli ki chnong hapoh u pood ka Mukhla Pyllun wei kani ka skur toh kawa kdoh lang ya kini ki chnong chirup wei ini man i chynna jngai ki waheh nachwa yei emkaam i stat i tip.
U Rakkam A Sangma da ong u wa ynne da yoo ya i chakri kani ka skur hawa da yoo ya ki bru wa da Pass na ka wei ini toh u man i ka nongmuna ya kiwa boon neibhah wa da pynkylla ko ya i rukom im ki bru.
Da ong u wa i dap sanphaw snem man i u moomer yong i kreh chitom yong kiwa da seiñ, kiwa sikai ka skur kamjooh waka imlang sahlang.
U Rakkam da ong u wa ka thaaiñ da pynmih ko ya ki bru wa pawnaam wow chakri ya ka jylla waroh kawi deiwa ngait skem wa daw ye ki wow pynkylla ya ki sngi wow wan.
Da ong u wa ka jylla wa ka jaitbru ka thaw toh kawa da kyrkhu da u Blai kamtæ emkaam wow pynneh ya ka khnang wow tip ka pyrthai ya ka deiwa kyntu wow sikai ya ki khynnah wow tia ki chaphrang wow rah ki yei naam ka jylla.
U Sñiawbhalang Dhar kam u kongsan da sñiawngooh u ya ki paidbah ka chnong kiwa da jied nyngkong ya oo kam u MLA chwa wow phiah ya ka Constituency (Nongbah-Wahiajer) wei kmen u wa katni u Wailadmiki Shylla da man u kam u MLA na ka chnong.
Da ong u wa sñiawsuk u wow kynmoo ya kiwa seiñ ya ka skur kamjooh ki 15 ngut ki khynnah heitu i por wei katni da em duna 700 ngut deiwa e khublei ya ki paidbah wa chong chnong kiwa da kreh wow pynheh ya ka skur.
Chooh chooh da ong u wa ka spah ymye u kit kat chawa lai ha pyrthai tangwa yei stat ye u rah ha kylleiñ wei i stat toh iwa ye wow pynkylla ya i pyrthai.
Da yaroh u ya ka chnong wa ka skur wa hanlada ym em yoh yarap ka skur katwa em leh na ka sorkar da em hadooh kamwa 700 ngut ki khynnah ha ka.
Ha kani ka sngi da pynlait leh ya ka Souvenir ka Golden Jubilee ka skur heiwa da pynkup burom ya kiwa sikai kamjooh kiwa seiñ ya ka skur wei da pynphooh ya ka da ki chaad wa i rwai.
Discussion about this post