U Symbood Montri Rangbah ka jylla, u Prestone Tynsong da ong u wa i klam yong oo ha kawi ka yalang ym em mut ya waroh kiwa sikai, tangwa da thaw u du ya kiwa yahkhmat ka Khasi Jaiñtia Deficit School Teachers Association (KJDSTA) kiwa da khut pynman yakhih ha kam kini ki por wa em Exam kut snem ki khynnah skur khlem da pyrkhat de ya ki khynnah wei kamjooh ya ki bei ki pa.
Hawa pynsñiaw yeiwa burom ya kiwa sikai, da ong u wa toh lyngba kiwa sikai da man u kamwa man katni, wei da ong u leh wa em kiwa thmu wow yahbakla wei chim kabu deiwa sdang yakhih heipor Exam ki khynnah.
Hawa pynsñiaw wa ka yakhih toh ka hok yong kiwa chong chnong, u Prestone da ong u wa lada kitæ kiwa yahkhmat ka Association em ki yei kitkhlieh ileh wym sangeh chwa ki yei yakhih ha kam ini i por wei yakhih won hadien wa kut ki Exam lane ha kawi won ka por, kamtæ da kyntu u ya kiwa yahkhmat ka KJDSTA wow pyrkhat biang ki deiwa miat.
Hawa klam hajrong i dawa yong kiwa sikai, u Prestone da ong u wa kiwa sikai Deficit yoh tulop ki kamwa yoh kiwi kiwa kreh sorkar, wei hawa yatoh wa ka Arrear yong ka DA (Dearness Allowance) yong ki, neiliang ka DSEL da klam che ko wow pynsmat noh u su ya ka Arrear.
Hajrong won i wym yahaap kiwa sikai ya ka Centralized Provident Fund (CPF), da ong u wa ka sorkar jylla da chim ko ya ka aiñ NPS (National Pension Scheme) wa da wanrah da ka sorkar India, tangwa hadien won da em wa ujor pyrchah ya ka NPS ha Kasari. Da ong u wa kani ka kaam dang sah ko ha High Court wei daw hap wow yang yei rai ka yung bichaar.





Discussion about this post