Shillong: Ka ri Israel da tyrwa ko wow booh ya ar tylli ki Centres of Excellence ha Meghalaya, kiwa yatoh wow pait yaki jhoor wa syad dor wa u soh khontara (Citrus) wa kiwi kam kini ki jait.
“Yaka Centre wa nyngkong daw booh ha chnong Jongksha, East Khasi Hills District neibynta ki jhoor wa syad wa sa kawi ha Dawagre, East Garo Hills neibynta ki soh,” da pyntip u montri rangbah ka jylla u Conrad Sangma hadien ka yalang wa tip kam ka Indo-Israel Economic Cooperation Dialogue on Horticulture Projects heiwa da emlang u Ambassador ka Israel cha India u Dr. Ron Malka kawa pynman ynne ka sngi ha Shillong.
U Conrad da ong u wa i yaklam da jan ye wow pyndep noh wei da yaklam waka sorkar India kamjooh waka sorkar ka Israel heiyatoh wa ini.
Kini ki ar tylli ki Centres of Excellence daw yarap poisa daka sorkar India hei dor wa T. 10 klur ka wi.
“Kani toh ka kaam wa emkaam bha wei i sñiaw i wa i pynemkaam da ki stat ka juk wa katni toh kawa emkaam bha heiyatoh waka rep ka riang. Deiwa kynmoo leh wa ym ye wow chim kabu yaki mar rep kiwa pynmih napoh ka jylla neidaw wym em i ya i stat (Technology) kamtæ ki warep leh ym ye ki wow yoh nong nong chiboon,” da ong u Conrad.
Da ong u leh wa dei yarap ka Israel kawa em hakhmat heiyatoh wa i stat wow pynku yaka rep ka riang daw yarap ko ya ki warep wow yoh yei kyrchaan wa emkaam ki.
U Conrad da ong u leh wa i yaklam ynne ka sngi toh u moomer wa emkaam bha heiwa neiliang u Ambassador da ong u wa ka Israel i kwah ko toh wow yarap ya ki warep ka Meghalaya wow pynbha pynmiat ya ki mar rep yong ki.
“Daw pynmih ya ki mar rep wa thymme, u sdang ya ki rukom rep wa thymme lyngba ki Centre of Excellence. Da yoo i wa kam kini ki Centre da man ki kiwa ye u kyrchaan pyn yaki hi hapoh ar snem kamwa da yoo ha kiwi ki Centre of Excellence kiwa em hapoh ka ri,” da ong u Ambassador ka Israel.
“Ini man ko leh kam i thong u Prime Minister, Narendra Modi wow pynku ar chah ya i nong yong ki warep kiwa man kam ki budloom ka khayi pateiñ ka India,” da ong chooh chooh u.
Chooh chooh u Malka da pyntip u wa daw yarap leh ya ki warep wow pynlai yaw yaki mar yong ki.
