Ynne ka sngi hadien wa kut ka Dorbar L’yur ka JHADC, neiliang u MDC ka Jowai Central, u Andrew Shullai uwa da wanrah ya ka phang yaklam hajrong i thaw ka Council iwa da chah wow noh jhep ka Jowai Municipal Board (JMB), da pynsñiaw u yei diaw mynsien hajrong ini i kaam hadien wa da phah khang noh wow noh ya i jhep ha ini i thaw.
Hawa yaklam wa kiwa pathai khubor, u Andrew da ong u wa da khyrngiat u hapoh ka Dorbar ynne neibhah wa ya i thaw (ha Mynkajai) da soi soskular ha ka 1 Naisaphra 2017 wa ka JMB, i thaw wow e ka Council toh neibynta 20 snem wei katkam ki kyndon, toh ka JMB wow chna kynroh ha ini i thaw noh jhep ha Mynkajai tangwa ynne neiliang u CEM ka Council da ong u ha ka Dorbar wa ka sorkar wa pyndam ko ya i noh jhep.
Da kylli u leh wa kammon hawa da em ka soskular hajrong ini i kaam, ka sorkar won da pyndam ko ya ka kamtæ ki paidbah won cheiwon u lai noh ki ya i jhep? Neibhah wa katkam ka soskular ka JMB hajrong wow chna ko ya i kynroh emkaam ko leh wow chna ya u sarok cha ini i thaw, wei wot ki kot, ki sla wa emkaam na ka Pollution Board leh ka wow leh.
U Andrew da ong u leh wa ymye wow kyntait wa em i nohroi ya i jhep da ki paidbah, wei ini i toh neidaw wa ka JMB ym em u chna ko ya u sarok katkam ka soskular wa da soi khamtam kam ha ini i por wa da yoh poisa ka Board na ka 14th wa 15th Finance.
Da ong u leh wa kattu daw chitom ki paidbah ka Jowai neibhah wym em thaw de wow lai noh jhep neibhah manda yoh ya i thaw leh ymye u pyntikna wa ym em i pyrchah wow noh jhep.
Chooh chooh da ong u wa hajrong wa da pynlut da ki phaw lak wow chna kynroh ha i thaw noh jhep ha Mynkajai, kattu daw thooh ma thooh thaw wei daw kær ma kær kynroh iwa pynlut sepai ya ka poisa, kamtæ da kyntu u ya ka sorkar jylla wow chimkhia ya ini i kaam wei ym toh wow pynthut wei wow bood thij ya ka soskular kawa 20 snem neibynta i suk wei wow lai bait i noh jhep hapoh ka chnong Jowai.
