15 49.0138 8.38624 1 0 4000 1 https://wyrta.com 300 0

Dooh mynsien ki paidbah wow yoh u tih mooyong biang wa da joor wa boon ki aiñ

0 Comments

Jowai: Ka Jaiñtia Amalgamated and Redressal Forum (JARF) kawa da seiñ hajrong ka yurim wow toor chakhmat neidaw wa sah doom ki paidbah wa ym em sñiawthooh ki heiyatoh waka kaam khih mooyong hapoh ka jylla kawa da ktah yaka yoh ka kot u paidbah hanlada ka Supreme Court da pynmih ko yaka hukum haka 07-07-2019 wa ya i tih mooyong toh u leh katkam ki kyndon aiñ ka MMRD Act.

Heiyatoh wa ini, ynnin ka 9 tarik da pynman yaka yalang paidbah ha chnong Shohshrieh East Jaiñtia Hills District, deiwa kyrchaan lang ki seiñbhalang waphær waphær, kiwa yah Truck, kiwa mylla sngi, ki warep wa ki bru wa pawkhmat nadooh ki MLA warim, MDC warim wa kiwa katni nalor kiwi de.

“Ka daw wa pynman ya i wow mih chakhmat toh wa hadien wa pynmih ka Supreme Court yaka hukum wow chah u tih mooyong deiwa bood ya ki kyndon ki aiñ ka MMDR Act, tangwa i eh won wa ka sorkar wa katni hadooh katni ym pynche ko wa kammon wow leh, ong ki wa da wai ya u mooyong tangwa ym yoh i wow khih mooyong, ong ki wa da yoh wow challan mooyong tangwa ym ye i wow dai”. Ong u Legal Adviser ka JARF u Kerlang Ksoo. 

Da ong u wa ha i pyrchang wow lai luti da sñiawthooh wa ini ym poi ko cheiwon cheiwon leh. Neibhah ha i thooh yumut na u Chief Minister, u Conrad K Sangma da ong u wa da dep wan ka Central Mine Planning and Design Institute ha Deiñshynrum, East Jaiñtia kawa da thooh bniah ya i rukom tih mooyong wa man katkam ka aiñ. Tangwa ya ini wa da leh nadooh u bnai wa nynngkong uni u snem wei ym pu em phah ki yaka Report da pyntip u CM, kamtæ ini pynyoo wa ka sorkar ym em chimkhia ko yei eh ki paidbah.

Hawa u kyruiñ cha ka rai ka Supreme Court, da ong u kawi kawa ktah joor dooh yei tih mooyong toh wa hap wow bood yaki kyndon ka aiñ ka MMDR Act 1957, neibhah katkam i bor yong i cheini, da ong u wa i wym ye wow leh. Neibhah chwa wow ktah yaka khyndaw hap wow pynbiang thij pa thij ki kot ki sla, wei haka MMDR em leh ki bynta ka aiñ iwa mut wa lada yaleh License i myntu ym toh wa daw yoh u tih syndon wei daw em chwa leh ka wow pyntikna wa em mooyong næ ym em ha ki thaw wa mut wei hadien daw ye wow pait yaka Mining List.

Hadien ini daw wan sa kiwi ki aiñ wa yatoh wow tih mooyong kam ka Income Tax, ka Mineral Concession Rule 1960, wan sa ka Mines Act 1950 wa kiwi kiwi won ki aiñ kiwa ym duna yaka 25 tylli.

“Hajrong ini ka sorkar ka tip bha ko yei eh wa em hapoh katai ka rai yong ka Supreme Court tangwa ym kwah ko wow pynche paidbah wei ye u em iyi iyi cha kylla yong ka”.

Neiliang ka NGT leh da pynmih ko yaka Committee kawa tip kam ka Katoki Committee wei na i daw wa ka sorkar ym ye ko wow chna yaka Mining Plan næ wot wow pynyoo yaki buit ki bor, kamtæ haka sien chong pyrkhat wa khatsan da wanrah ko daka Highwall Mining.

Da pynbaad wa ka sorkar ym pu em khyrngiat ko wow chna yaka Mining Policy neidaw wa dang boonkaam wow pynlut bor yei rukom kit ya u mooyong wa ya i rukom dai lilam ya u mooyong. 

Da ong leh wa lada heini ka sorkar ym khyrngiat yong bru ko ya i rukom tih mooyong wa tip kam ka Highwall Mining wa da wanrah hakhmat ka Katoki Committee kawa man katkam ka aiñ MMDR Act wei lada pynskem yaka, daw man ko ka sngi wa pynsñiawsih kthang ya u paidbah neibhah i kut da poi ko.

Chooh chooh da ong wa lada poi daka tih mooyong daka Highwall Mining, i lut man ko kawa heh kawa daki spah klur, wei emkaam leh ya ki thaw wa heh khlem da yaklam sa ya ki kot ki sla wa emkaam wa haap wow pynbiang, sa ki kor wa pynemkaam leh kiwa chong dor da ki klur. 

Ha kani ka yalang paidbah kiwa klam da e ki yei kyrchaan ya kani ka Forum wa kynthup ya u Erwin K Sutnga (Muktiar), u Obil Kyndait Ex-MLA, Lakhon Biam MDC ka JHADC nalor kiwi de ki MDC warim wa kynthup ya u J. Pyrtuh, u Bison Iano, u Hambertus Nongtdu (Ex-CEM JHADC), ka Voilet Lyngdoh ka MDC warim, neitæ u President ka Jaiñtia Hills Truck Owner Association u Nidamon Shullet, u President ka KSU Jaiñtia Hill Unit u Ohibait Dkhar wa kiwi kiwa da pynsñiaw ya ki jar jiar ki yurim.

Kamtæ lyngba kani ka yalang da khut yaka ya krehlang u paidbah neibynta ka yap ka im yong ka chong ka thaw waka jaitbru wei wow booh chadien yaka i sñiaw emliang ha kawon kawon ka party saiñ hima sima. 

Chwa ya ini da pynskem leh ya kiwa kitkaam ka Jaiñtia Amalgamated and Redressal Forum (JARF) heiwa u Helping Phawa MDC warim u man u kam u Chairman, u Satly Ryngkhlem waheh chnong ka Wapung wa u Duno Nongpluh MDC warim kam ki Vice Chairman, u Lening Rymbai kam u General Secretary, u Reachingson Siangshai Asst. General Secretary, u Justine Dkhar MLA warim kam u Spokesperson wa u Thomas Nongtdu kam u Treasurer.

0 Comments

Leave a Reply