Ka kynthai wa dang punkhon kawa da chah pakhot napoh ka Train ha u bru wa thmu wow slaitbor ka, da dooh noh ko yei khon ko iwa da pun ko la soo bnai hadien wa sangeh noh i klongsnaam i.
Kam wow pynkynmoo wa ini da jia i ha ka 6 tarik uni u bnai wei ki pulit da kem ki ya uni u bru wa leh ya ini i kaam uwa tip kam u Hemraj.
Neiliang ka chnat Railways da pynbna ko wow e yarap Rs. 50,000 neibynta kani ka bru.
Kani ka bru kawa da mynsoo ha kiwa boon ki bynta toh kawa kreh ha kawi ka karkhana wa pynmih that wei da chah pakhot ko cha lait hajan Jolarpet, Tamil Nadu ha u Hemraj uwa psiah hapoh ka Ladies Compartment.
Hawa khana ya kiwa thoh khubor ya ini wa jia ya ka da ong ko wa hadien wa hiar kiwi ki kynthai wei da em ko samen, uni u bru da psiah u syndet syndet heipor wa da sdang lai ka Train heiwa da ong ko ya oo wa kani ka Compartment toh neibynta ki kynthai donhi tangwa da ong u ya ka u hiar u mar ya poi ka Station wow wan.
Katkam wa khana ko, uni u bru da chong u kiaw kamwa 30 minit dep tæ manda mih u na paikhana da looid sula u wei da pyrchang u wow looid ya ki sula ko wei da kyrpaad ko ya oo deiwa ong wa punkhon ko wei da man ko ko kam ka payu para yong oo.
Da khana ko leh wa manda pyrchang ko wow taan ya u Chain yow pynsangeh ya ka Train, da taan u ka wei da dat u ka wei da pyrchang ko wow yut cha paikhana yow kset ko ya idæ tangwa da tyngkheiñ u yei kti ko wei da taan won u ka cha ka dwar ka Train yow pakhot ka cha lait wei da yaleh ko wow ksoh katwa ye ko tangwa da kynjet u ka hadooh wa haap ko cha lait.
Mar ya haap ko yapler wot ko wei da khyrngiat ko manda poi ko ha Hospital wei da mynsoo ko hei bynta i khlieh, ka kjat wei skep.
Da khana ko leh wa da yaleh pyrchah ko wa uni u bru rap slem bha deiwa kyrpaad ya ki bor ka aiñ wow pynchitom ya uni u bru wei wym toh de wow pynlait oo.
Puræ leh: Chah pakhot ka kynthai wa punkhon napoh ka Train wa dang lai ha u bru wa thmu u slaitbor ka
Discussion about this post