U Montri i chait i khiah ka jylla Meghalaya, u James K. Sangma ynne ka sngi da ban joor u yei emkaam wow pynkhlan ya ki thaw sumaar ka sorkar nadooh kiwa em ha ki chnong ki thaw wa kiwa boon ki chnat wa mih yow e sumaar, deiwa kdaw leh wa ka Meghalaya da pynbna ya ka ha uni u bnai wa dep kam ka kawi na ki le tylli ki jylla wa khian namo ki Top 3 State wa boon wa wan yow thiah Hospital iwa pynyoo wa biang i krehkaam ka Health Insurance Programme.
Hawa klam kam u kongsan ha ka yalang wa pynman da ka Indian Institute of Public Health-Shillong (IIPH-S) yow chba ya ki kaam wa yatoh wa i chait i khiah hapoh ka jylla, u Montri da pynsñiaw u yei sñiawsih wa em du 12% ki khynnah wa jied u lai puræ da ka Science Stream hadien Class-X.
Katkam ka Result ka MBOSE Class-XII 2020 da pynyoo wa du 12% ki khynnah ha Meghalaya kiwa da jied ya ka Science Stream, 7% da jied ki ya ka Commerce Stream, katwa 81% da jied ki ya ka Arts Stream. Hawa nujor wa kiwi ki jylla kam ka Tamil Nadu, Kerala, Karnataka wa Maharashtra, kiwa jied ya ka Science Stream da em ki 70-85%.
Ka IIPH-Shillong toh kawa pynman leh ya ka e sikai Bachelors in Public Health (BPH) nadooh uni u snem yow pyndap yei duna ki bru wakreh ha ki kaam sumaar sukhær yow pynchlur ya kitu kiwa wan na ki thaw wa man palatsor yow puræ ki ha ka Science Stream.
Hawa e khublei ya ka 1st Batch ka Masters in Public Health (MPH) kiwa da ye wow pyndep ya kani ka Degree na IIPH-Shillong, u Montri da yaroh u leh yei kyrchaan ka IIPH-Shillong wow yarap ya ka State Health & Family Welfare Department lyngba i chem phang yong ki ha kiwa boon ki jait wa yatoh wa i thooh bniah.
Ha kani ka yalang da yoh leh ya ki kyntien pdiang sñiawbha na ka Dr. Melissa Glenda Lewis, wa i klam na ka Dr. Sandra Albert, Director, IIPH-Shillong.
U Principal Health Secretary, u Sampath Kumar, IAS, uwa man kam uwa chah khut kyrpang, da ong u wa ka Meghalaya em ko hei wa soo (4th Position) na ki jylla wa khian heiyatoh i mang poisa wow pynlut heiyatoh wa i chait i khiah.
