U Montri Rangbah ka jylla, u Conrad K Sangma hapoh ka yung dorbar ynne ka sngi da pyntip u wa em i duna ki sahep IAS hapoh ka jylla kiwa em du 41 ngut heiwa na kini da em 23 ngut kiwa da man bait kam ki IAS wa 18 ngut kiwa da pynku kyrdan cha ki IAS.
Waroh hapoh ka Assam-Meghalaya Cadre da em ki 77 ngut ki IAS wei 5 ngut toh kiwa da chim da ka sorkar pyrdi namo ka Central Deputation.
U Conrad leh da pyntip u wa ka sorkar jylla dadep ko wow thoh cha ka sorkar pyrdi wow pyrchah yei thmu wow pynkylla ya ka IAS Cadre Rule heiwa ka sorkar ye ko wow chim ya ki IAS kiwa em ha ki jylla.
Da ong u leh wa hawa nujor wa kiwi ki jylla wa em chajan- hapoh Manipur da em ki 110 ngut ki IAS, ha Tripura 102 ngut wa ha Nagaland 91 wei yow pynboon ya ki IAS wa yoh ka jylla, neiliang ka sorkar dadep thoh ko cha ka sorkar pyrdi ha u 2019 yow paan ya ka Meghalaya Cadre kawa katni toh kawa tip kam ka Assam-Meghalaya Cadre kamwa da dep phiah ya ka Manipur-Tripura Cadre.
Da pyntip u leh wa hapoh ka jylla ki MCS wa da pynku kyrdan cha ki IAS da em ki 18 ngut wei da pyntip u leh wa katkam ka kyndon da pynku kyrdan ya ki.
Hawa kylli won wa lada hoi namo ym hoi wow pynku kyrdan da kiwi ki sahep sorkar cha ka kyrdan MCS heiwa chisien da dep em kamni hadooh wa uwi da yoh u wow man DC ka Nongstoin.
Neiliang u Conrad da ong u wa hap wow bood ya ki kyndon deiwa ong wa ye u pynku kyrdan heiwa ym toh u tam 23 ngut hawa lait kaam.
Chooh chooh da pyntip u wa yow pynchlur wow yaleh Exam wow man IAS, ka sorkar da jooh pynman ko ya ki e sikai namo ki Coaching Class.
