Shillong: U MLA/MDC warim ka Nongkrem Constituency u Ardent Miller Basaiawmoit, da pynsñiaw u wa du ka Notification da biang pura ya ka sorkar jylla wow wan chakhmat wow pynbna noh ya ka rai wow pynkrehkaam chi syndon ya ka Inner Line Permit (ILP) ha kani ka jylla.
Ya ini u Ardent da pynsñiaw u ha ka yalang wa ki laad pathai khubor ynne i janmiet.
U Ardent da pynkynmoo u ha u snem 2013, heipor wa dang man u kam uwa mihkhmat næ MLA, da lai u wow rah ya ka Resolution hapoh ka yung dorbar chna aiñ yong ka jylla, tangwa ya kani ka phang dawa ka yong oo ha kitu ki por wow pynkrehkaam yaka ILP ha Meghalaya da theh um dait thah hadien wa da chah rem noh ko lyngba ka Voice Vote.
Hawa kyruiñ cha ka yakhih yong ki paidbah, u Ardent da pynsñiaw u yaka mynsien kawa sñiawkmen wa chem u wei wow yoo yei mih paidbah wow ya ksohkti lang wow dawa deiwa eh na ka sorkar jylla wa i por da emkaam wow pynkrehkaam yaka ILP, hadien wa ka sorkar NDA ha ka tayaw wa da dep da ye ko wow yoh mynjur na waroh artylli ki yung dobar chna aiñ ka ri ka Lok Sabha wa Rajya Sabha neibynta wow pynkrehkaam ya ka Citizenship Amendment Act.
Hawa yatoh wa ini, u Ardent da kyntu u ya ki paidbah wa ym toh wow chongngiah ha kani ka kynti kawa katni, neibhah u soh dawa wow pynkrehkaam no ya ka ILP ha kani ka jylla katni da jan yoh pura ya ka, hadien wa ka sorkar jylla da chim ko yaka rai wow khut yaka yalang wa kyrpang ka yung dorbar chna aiñ wow mynjur yaka Resolution neibynta wow rai pynkrehkaam noh ya ka ILP.
Chooh chooh u Ardent da maham joor u ya ki paidbah chnong ka jylla, wa ki ym toh de wow chah pynbeij ha kani ka kynti kawa katni, deiwa ong “Ham e laad ya ki Politician wow chim kabu wow pynslem ya kani ka dawa hok ka yong i, tangwa wow yakhun deiwa eh hadooh wow yoh syndon ya ka ILP ha ka jylla”.
Discussion about this post