U kyrtong ka Congress cha ka Election chiteiñ samoi na Shillong Parliamentary Constituency, u Vincent H. Pala ynne ka sngi ha ka yalang ha Sutnga da ong u wa kani ka Election man ko kawa phær na kiwa dep hawa ympu tip lada u em ha ka Liang Synchaar næ Liang Pyrchah tangwa ha kani ka kynti da tikna wow em ha ka Liang Pyrchah wei emkaam u lai cha Delhi wow tip kammon u yada ya ki khon ki kti wa kiwa boon kamjooh ka mynried yong ki.
Da ong u wa ka aiñ FCRA man ko kam ka Permit Taxi heiwa lada ym ye u Renew ha ki 6 snem ye ki wow knieh ya ki thaw wa ki yung wa tei heiwa katni da em ka Designated Authority ki wow knieh ya ki, heiwa da e nongmuna u yeini wa lada ka Elaka Suspend ko ya kiwon kiwon ye ko leh wow knieh ya ki yung kiwa chah Suspend.
Da ong u wa ka BJP ym em chna aiñ ko du neibynta kiwi tawon tangwa ki wow pyrchah bait ya ki Christan.
Chooh chooh da kyrpaad u wow mylliñ chwa ya ki MDC wa ki MLA neibhah wa u MP toh wow phah cha Delhi wow chna ya ka aiñ heiwa da kdaw u ya ki aiñ wa da chna ha kiwa boon ki jylla wa synchaar ka BJP wow khang wow kylla niam namo Anti Conversion Laws iwa man pyrchah ya i hok wow bood ya kawon kawon ka jait niam heiwa da kem ya kiwa boon ki Father, Sister wa Pastor wei katni da kwah wow wanrah sa ya ka FCRA wow knieh ya ki thaw niam.
Da kdaw u leh ya ka Uniform Civil Code kawa da thmu wow pynman aiñ ya ka wow ktah bha ya ka jaitbru cheini neibhah wa ktah ko nadooh i chongkha, i rap pateiñ wa kiwi deiwa ong wa waroh ki bia lyngba kani ka aiñ toh lyngba ka Court heiwa daw pynhiar ko yei bor wei burom ki heh niam Christan.
U Vincent da kdaw u leh ya ka hukum ka Supreme Court kawa ong wa kiwon kiwon ki Schedule Caste kiwa kylla cha ka niam Christian ymye de ki wow man kam ki SC wow yoh myntoi kam ki jaitbru khian paaid.
Da ong u wa katni dang em hi i maya ki paidbah ya ka Congress tangwa ki heh yong ka waroh da chah thied lut ki.
Heiyatoh wa i khang mooyong wa ong ki wa u Vincent uwa khang mooyong heipor ka Congress, da pynche u wa ya u mooyong da khang da ka NGT.
Hajrong ka Vote Chori namo i chah tooh ki Vote, u Vincent da ong u wa yoo i leh thok ka BJP heiwa ki jooh ki bru wow lai da ki rel wow thap Vote cha kiwi ki jylla lada ha Haryana, Karnataka, West Bengal wa kiwi.
Da ong u wa kawi na ki Scheme wa kwah ka BJP wow pyndooh toh ka Scheme 100 sngi heiwa katni da pynchitom bha ya ki paidbah heiwa da phah wow chondur, u chonkti, wei boonjait iwa leh ka sorkar iwa pynyoo wa ym chaniah de ko ya ki paidbah wa ki waheh chnong wei deiwa leh kamni daw pyndooh ko ya kani ka Scheme.
Heijooh i por da kdaw u chiboon ki kaam pynroi wa da wanrah u heipor wa man u kam u MP nadooh ka Land Port ha Dawki, da wanrah ya ka Meghalaya High Court, ki sarokbah wa kiwi kiwi.
Discussion about this post