Ynne ka sngi neiliang ka Congress da pynman ko ya ka yalang yalap Election neibynta u kyrtong MP yong ka, u Vincent H Pala ha Sutnga heiwa u MP warim ka jylla cha Rajya Sabha, u Dr. WR Kharlukhi da ong u wa em ar tylli ki phang wow klam u heiwa kawi toh kawa ktah yei ngait yong ki bru wa ka phang wa ktah ya u kpoh ki paidbah ka East Jaiñtia Hills.
Da ong u wa katkam kawi ka kyndon ka FCRA ka Clause 16 (a) lada man aiñ ko daw ktah ko ya kiwa ngait niam Christan heiwa daw ye ko wow knieh ya ki yungmane, ki thaw sumaar, ki skur wa ki thaw puræ wa wot ki thaw sumaar wa pynlai da ki seiñ niam.
Kamtæ da kyntu u wow khnioñ ya u kudam yow jied da uwa ye u yada ya i ngait niam yong ki bru neibhah wa oo kyrchaan u ya ka Congress neibhah wa toh du ka donhi wa pyrchah ha Parliament hadooh wym ye ka BJP wow wanrah ya kani ka Bill wow pynman aiñ ya ka ha Parliament.
Da ong u wa ka Congress da dawa ko wot hadooh wow pyndam noh ya kani ka aiñ neibhah lada bakla ha kani ka Election daw man iwa sepai neibhah wa 98 ngut ki MP ka Congress da pyrchah ki ya kani ka aiñ wei lada kwah u pyrchah ya kani ka aiñ emkaam u jied ya u Vincent Pala kam u MP neibhah wa chong i ha i rai yong uwi pa kawi.
U Dr. Kharlukhi da ong u wa ka NPP em ko ha ka sorkar ka BJP katwa ka VPP won sah ko samen ha Parliament kamtæ deiwa jied ya u Vincent daw ku i bor ka Congress cha ka 99 ngut ki MP.
Da kubur u yei chongchit VPP ki paidbah ha ki Election wa dadep heiwa da pynjop ya ka tangwa iwa jia ha ka ri pynkynmoo ko ya i sur ‘Dil Laka Dekho’ neibhah ha kani ka Election ym emkaam u ap yei sñiaw ha mynsien tangwa u ap yei jabieñ wei pyrkhat.
Da ong u wa heipor wa klam khubor u ha Shillong yei daw wa psiah Congress u da em kiwa kylli wa u CM Conrad Sangma da yah u ya ki Pastor wa ki Father wow yachem wa u Amit Shah neibynta wow pyrchah yeini tangwa ym em jubab u Amit katwa em.
Chooh chooh da kdaw u wa heipor wa yaklam u chirup wa ka Agatha Sangma neibynta i kyrdan Vice Chancellor ha NEHU heiwa da tyrwa wow thung da ka bru na Nangbah kawa da biang i kyrdan tangwa manda mih ka hukum da mih da u bru u yong ki hi.
Heiyatoh wa u mooyong da ong u wa man u thied snaam ym du yong ka ri Jaiñtia tangwa u yong ka Meghalaya waroh kawi neibhah wa hawa mih u mooyong na Jaiñtia Hills kamwa 2,000 tylli ki Truck da em leh 4,000 tylli ki manyung wa im na u mooyong khlem kheiñ ya ki tre paar wa kiwi de.
Da ong u heipor u mooyong, ka sorkar yoh ko ya ka Cess Tax wa Rs. 700 klur wa da yoh bynta ha ka chnat Education wei ym em wa yakhih kiwa sikai neibhah wa biang ka tulop ki, wot hadooh ki District Council leh ym dooh tulop kiwa kreh da ki bnai, kamtæ man u mooyong u thied snaam ka jylla waroh kawi.
Da kynmoo u ha Dawki da boon wa ood wa yap ka yaaw tangwa lada wai u mooyong ym jia i kamtæ.
Chooh chooh da kdaw u wa ka VPP da ong ko wow khang ya u mooyong heiwa da ki hajar klur da chah knieh u mooyong na East Jaiñtia Hills ha kitæ ki Enforcement hawa kamtæ u yong uni u mooyong.
Da kdaw u wa em kiwa ong wa heipor wa man MP u ym em u klam u chaphang u mooyong tangwa jubab u ya ki deiwa ong ham klam tangwa yoh neibhah ha u December 2025 du oo donhi wa klam ya ka NGT wa khang ya u mooyong uwa man ka pliang ja ki bru cheini deiwa kylli u hapoh Parliament deiwa kdaw yei yap ki doh-um tæ ileh wym khang ya ki karkhana ha kylleiñ ka nongbah New Delhi.
Da kynmoo u wa heipor man u kam u President ka JSU ki paidbah ka Ri-loom Jaiñtia leh ym jooh ieh ki oo wei wot hadooh heipor wa man u kam u MP ha Rajya Sabha.
Da ong u wa ym jooh pait u ya ki Social Media neibhah wa joor du i thok wei jlær wei heitæ chong u soitan heiwa da em kiwa pynbaad wa tooh u ya ka Scheme paidbah tangwa nood u wow ong wow lai cha Office DC wa Block wei lada chem sakhiat kamtæ oo leh hun u wow chong ha patok.
U Kharlukhi da ong u wa na Sutnga mih u syiem Jaiñtia yong ka Hima Jaiñtia kawa na Jaiñtiapur chadooh cha Naogaon wei neitæ mih ka United Khasi Jaiñtia Hills Autonomous Council tangwa katni ka VPP kwah ko wow pyndooh yeini i yatylli.
Da ong u leh wa ha u 2028 ym em wa ye u chna ya ka sorkar khlem kreh wa ka Congress dei yooluti wa u Vincent u man u kam u Chief Minister.
Discussion about this post