U Symbood Montri Rangbah ka jylla Meghalaya, u Prestone Tynsong, ynne ka sngi da wai u yaka Website wow thap pyrtuid, yow pyntipmit namo wow Register ya ki wakreh mylla wa wan na baar jylla iwa man katkam ka aiñ Meghalaya Identification Registration (Safety and Security) of Migrant Workers Act 2020, haka yalang wa pynman daka Labour Department ha NIC Conference Hall, Shillong.
I thong ka aiñ Meghalaya Identification Registration (Safety and Security) of Migrant Workers Act 2020 toh yow pynryntih kamjooh wow yada ya ki wakreh mylla wa wan na baar wa em ha Meghalaya deiwa yoh ki yei tipmit kamjooh ym hoi de u dam wow leh Registration ya waroh ki wan kreh mylla hapoh ka jylla.
Kani ka Website toh kawa e laad ya ki wakreh mylla wa wan na baar kamjooh ki bru wa ki Contractor wa e kreh ya kiwa na baar wow leh ki yaka Registration, wei ki wym leh yeini daw chah daiñ kuna ki hadooh T. 5000. I leh Registration lyngba kani ka Website ye wow leh na iwon iwon i bynta ka ri, na ki Common Service Centers kamjooh na ka Help Desk ka Registration Office deiwa su T. 50.
U Prestone hawa e yei klam da ong u wa i pynkrehkaam yaka Meghalaya Identification Registration (Safety and Security) of Migrant Workers Act 2020, kattu da man ko wa i e yaka Labour License chong ko du haka sorkar jylla.
Da ong u leh wa deiwa sdang ya kani ka Website, daw pynsuk ko yei khih i khan wa i krehkaam hapoh ka jylla, deiwa pynchlur u leh wow pynemkaam ya kani ka Website yow yoh u booh pyrtuid ya waroh ki wakreh mylla wa wan na baar. Deiwa kdaw leh wa ini toh iwa emkaam bha wow leh yow pyndep ya ki kaam pynroi hapoh ka jylla kiwa emkaam ya ki bru wa na baar yow pyndep yei kreh kiwa boon ki chnat sorkar.
Da ban joor u wa du kitu donhi ki bru wa man paka kiwa ye wow pyndap ya waroh iwa emkaam ka aiñ kiwa daw yoh Labour License.
