Jowai: Hadien wa hukum ka kasari Meghalaya High Court wow pynman ya ka Dorbar ka Chnong Ummulong wow pynyoo lada dang kyrchaan ya u SS Langi kam u Waheh Chnong, ynne ka pynman ya ka yalang heiwa da wan da ki spah ngut kiwa chong chnong ka chnong.
Ya kani ka dorbar da pyllai da u Chairman ka chnong, u Riwan Pohshna heiwa da wan sakhi ya ka da u Dolloi ka Elaka Jowai u Puramon Kynjing.
Kani ka Dorbar da man ko kawa chongchit heiwa kiwa kyrchaan yong u Leo Laloo uwa man kam u Acting Waheh Chnong wa u SS Langi da chong ki jar jiar heiwa da kbai da kyr’iaw ki ya i pyrtuid u bru yong ki.
Kiwa kyrchaan ya u Leo Laloo da rah ki leh ya ka that yong wa thoh ya ki kyntien wym chaniah de ya u SS Langi kam u Waheh Chnong.
Chwa wow sdang da yoh i klam na u Dolloi ka Elaka uwa da pynsñiawthooh ya ki yei mut kani ka Dorbar kawa man katkam ka hukum yong ka yung Kasari High Court.
Da elaad ya kiwa chong chnong wow klam ki ha kani ka dorbar wei da yoh i pynsñiaw du na ar ngut kiwa chong chnong neibhah wa da joor ware i kbai i kyr’iaw ki paidbah.
Hadien ini da pynyoo bor deiwa phah yieñ ya kiwa ym em de kyrchaan ki ya u Langi heiwa da yieñ khrui kiwa pyrchah ya oo wei wot heitæ leh kiwa em neiliang u Langi leh da yieñ ki joit næ, iwa pynyoo wa kamwa 80 naka 100 ym em de kyrchaan ki ya oo.
Hadien ini da pynkut noh ya ka dorbar wei kattu u Dolloi daw phah u ya ka bui (Report) cha ka JHADC hei yatoh wa kani ka Dorbar ynne ka sngi.
Kiwa chong chnong da kyrpaad ki ya u Dolloi wa ya ka JHADC wow pynsmat ya ini i kaam khnang wa ki paidbah ka chnong u suk ki.
Discussion about this post