U Chief Executive Member (CEM) ka Khasi Hills Autonomous District Council (KHADC) u Titosstarwell Chyne da ong u wa du kitu ki kynthai kiwa yoh kurim da ki khyllah jait næ ki wym toh ki Khasi kiwa pyrchah ya ka Khasi Hills Autonomous District (Khasi Inheritance of Property) Bill, 2021.
U CEM da ong u wa i thmu yong katai ka Bill toh wow pynbait yei hiar pateiñ ki Khasi hei e bhah yei thaw i bhaw, ka spah ka phaw cha ki khon ki kti yong ki khamtam cha ki khon chynrang.
Da ong wa hadien wa ka KHADC da wanrah ko ya kani ka Bill da yoo ya kiwa boon ki khon chynrang Khasi kiwa da pynsñiaw yei kmen wei sñiaw chngaaiñ lyngba ki rynsan Social Media.
U Titos da ong u wa da pynkyrbeh won ya kitu kiwa yoh kurim baar jylla næ khyllah jait, khamtam ya ki kynthai Khasi wa kani ka Bill daw khang noh yei yoh pateiñ i yong ki, wei kiwa rap pyrchah ya kani ka Bill katkam wa da yoo ha ki rynsan Social Media, toh kitu kiwa yoh kurim baar jylla.
Da ong u wa kwah wow e khubor wa lyngba kani ka Bill i thmu toh yow kdoh u khoom ya ka jaitbru wa i chngaaiñ yong ki khon chynrang neibhah boon boon snem ki khon chynrang ki sñiaw ki wa ym em hok næ sñiaw chngaaiñ ha yung, wei kamtæ da wanrah ya kani ka Bill wow e kyrmen ya ki khon chynrang kiwa teiñ teiñ da noh mynsien wei sñiaw wa ki ym em de ki ya ka mynried hakhmat yong ki.
