Shillong: I paan kyrchaan ki kyrtong ha ka Election chiteiñ samoi ha ki ar tylli ki Constituency, kitæ ha Ranikor wa South Tura ka wow man ha ka 23 tarik da kut noh ko ynne ka sngi wei i thap Vote daw sdang i nadooh 7 waje i step hadooh 5 waje i janmiet ha ka 23 tarik uni u bnai katwa ka niaw Vote won u man ko ha ka 27 tarik uni u bnai.
Hawa yaklam wa u Chief Electoral Officer (CEO) ka jylla, u Fredrick R Kharkongor da pyntip u wa ka yalap Election da kut ko hapyrdi i suk i saiñ khlem iwon iwon i awri næ i jia wa sñiawsih.
U CEO da pyntip u leh wa i pynkhreh neibynta ka Election da man ko kawa lai bait wei ki bor wa toh u pait ya i thap Vote ha ki Polling Station ha ka 23 tarik toh u poi ki chwa i por.
Heiyatoh wa i tyngkheiñ ya ka Model Code ha kini ki ar thaw, u Chief Electoral Officer da pyntip u wa da khyrrup du ya ka poisa T.12.86 lak na ki bru samen na Ranikor Constituency wei hajrong ini da chimkhia wow takit da ka Committee wa khlieh da u Deputy Commissioner ka District.
Ka South Tura Constituency em ko 30,231 ngut kiwa thap Vote wa kynthup 14,846 ngut ki chynrang wa 15,351 ngut ki kynthai, 33 ngut ki Service Voter wa u wi u NRI na ki 36 tylli ki Polling Station, wei ka Polling Station kawa boon dooh kiwa thap Vote toh ha Matchakolgre kawa em 1337 ngut kiwa thap Vote wa kawa duna dooh toh ka Leper Colony kawa em du 151 ngut.
Ka Ranikor Constituency em ko 65 tylli ki Polling Station ryngkat 29,685 ngut kiwa thap Vote heiwa 15,183 ngut toh ki chynrang wei 14,487 ngut ki kynthai. Napyrdi kini, ka Polling Station kawa boon dooh kiwa thap Vote toh ka Rangthong kawa em 817 ngut wei kawa duna dooh toh ka Nongbahjynrin-Mawthabah kawa em du 12 Vote.
U CEO da ong u wa ka percentage wa wan thap Vote ha South-Tura ha ka Election ha ka 27 tarik u Thohlakhmi, 2018 toh 73.59 % katwa ha Ranikor won 89.95 %, wei da yooluti wa daw ku ki lada man ka bneiñ kawa biang.
Da haap pynman biang ya ka Election chiteiñ samoi ha kini ki ar Constituency toh hadien i ieh kaam noh u Martin M Danggo na Ranikor wa ka Agatha K Sangma na South Tura kam ki dkhot ha ka Yung Dorbar Chna Aiñ ka Jylla.
Ha South Tura, u kyrtong ka NPP, u Conrad K Sangma u yakhun pyrchah u ya ka Charlotte W Momin na ka Congress, u John Leslee K Sangma wa u Chris Kabul A Sangma kiwa man ki kyrtong samen katwa ha Ranikor, u Martin M Danggo ka NPP u yakhun pyrchah u ya u kyrtong ka UDP u Pius Marwein, u Chairman ka PDF u PN Syiem wa u Jackquese Sangma ka Congress.
Waroh ar tylli ki Constituency toh kiwa kongsan neibynta ka NPP kawa yahkhmat ya ka sorkar synrop Meghalaya Democratic Alliance (MDA) khnang wow ye ko u pynkhlan chooh chooh ya ka synchaar ha ka jylla.
Ha iwi i liang u CEO da ong u wa da pynkhlan leh ya ki bor sonteri ha kini ki ar tylli ki Constituency khnang wow lait na iwon iwon i pynthut.
Discussion about this post