U Montri ka chnat Food & Civil Supplies ka jylla, u Comingone Ymbon da kyntait wa em i ki ku dor palat pood ki marbaam ha jylla, deiwa ong u wa i yaphær toh kajiak lada nujor yei dor cha kiwi ki jylla.
Da ong u wa i wym em ka luti rel toh iwi na ki daw wa ku dor ki mar hapoh jylla Meghalaya neibhah waroh ki mar da chaniah bait na baar wei wan ki lyngba ki sarok, heiwa da ong u wa i dor u khoo duna u ha Garo Hills wei i yaphær hadooh Rs. 13 chi kilo wei dor ha Shillong, neibhah ha North Garo Hills em ka luti rel ha Mendipathar.
Da ong u leh wa i daw i yaphær i dor wei ku ha Meghalaya toh wym bait de ka luti wow pynpoi marbaam cha Shillong hadien wa da khang ya ki kari heh wow lai na yingkieñ Dam Umïam.
Ini i klam u Montri da mih leh hadien wa ka Voice of the People’s Party (VPP) da pynman yakhih ko ynne hajrong i ku dor ki marbaam.
Hajrong ini i yakhih yong ka VPP, u Montri da ong u wa ini toh du wow myntoi ka Party, deiwa yah bakla ya ki paidbah kiwa lui lui.
U Comingone da ong i wa i ku dor ha ki kattu katni ki marbaam kam ki jhoor wei doh toh neidaw wa boon hi da chaniah marbaam bait na baar jylla.
Heijooh i por da ong u wa neipor cheipor ka chnat jooh lai pait ko wow pyntikna wa ki dukan u booh ki ya i dor hakhmat dukan wei lyngba ki Deputy Commissioner da booh leh ya ka Price Monitoring System wow kdoh nei dai palat yei dor.
Discussion about this post