U Montri Rangbah ka jylla, u Conrad Kongal Sangma da pyntip u wa nadooh wa da booh ya ka khyrdop Entry/Exit Point ha Umling, Ri-Bhoi District, kiwa wan uiñke suwari wa wan na baar ka jylla hadooh ka 4 tarik uni u bnai da em ki 26,123 ngut. Da pyntip u wa ha u Kmaichonglad 2020 da em 5,551 ngut kiwa da wan cha ka jylla kam kiwa uiñke suwari, ha u Duyatra (Jan) 9,558 ngut, Thohlakhmi (Feb) 9,664 ngut wei nadooh 1 tarik hadooh 4 tarik u Wisu da em 1,350 ngut kiwa uiñke suwari wa wan cha ka jylla.
U Montri Rangbah da pyntip u ya ini hawa jubab yeiwa kylli wa da wanrah da u MLA ka West Shillong, u Mahendro Rapsang hajrong i em kiwa wanke cha ka jylla nadooh wa pynkrehkaam ya ka Entry/Exit Point ha Umling, wa i chah ktah ki tre chnong.
Neiliang u Conrad da pyntip u leh wa i wan yong kiwa uiñke suwari na baar da rap hiar hawa ya nujor wa kiwi ki por, deiwa pynrap leh wa ki paidbah ka jylla kiwa kamai na ki kaam uiñpyrthai da dooh nong ki.
U Montri Rangbah da pyntip u leh hapoh ka Yung Dorbar wa ka Kynhun Montri (Cabinet) da chim ko ya i rai wa kiwa wan uiñke suwari wa wan cha ka jylla Meghalaya la kammon kammon hap ki wow sah 48 kynta, ha i por wa dang sdang u wai, wei katni da pynkylla cha ka 24 kynta neibynta wow taan ya kiwa boon kiwa wanke. Da ong u wa ini i rai yong ka sorkar toh neibynta wow kyntu leh ya kiwa chong chnong kiwa kamai na ki kaam uiñke suwari.
U Conrad da ong u wa ka sorkar ym em chim ko yaka luti wow yarap ya kiwa chong chnong kiwa chah ktah na i duna kiwa wan uiñke ha i por wa joor ka khlam COVID-19, tangwa da pyntip u wa iyi wa ka sorkar da ye ko wow yarap da leh ko deiwa maap chim bai wai na kitu kiwa chong chnong kiwa pynemkaam næ chim wai ya ki thaw sorkar lyngba ka chnat Tourism.
U Conrad da pyntip u leh wa ka sorkar da yarap ko ya kitu ki bru kiwa em ha ki kaam uiñke suwari ha i por wa chah ktah na ka khlam COVID-19, deiwa chim wai ya ki Hotel, Home Stay wa kiwi yow pynman kam ki Corona Center, wei i lutphut neibynta ini man ko T. 20 klur.
